Paşatəpə tarixi abidəsində növbəti dəfə arxeoloji tədqiqatlar aparılıb.

Bu barədə İqtisadiyyat.az-a AMEA-nın Arxeologiya və Antropologiya İnstitunun baş elmi işçisi, Muğan Neolit-Eneolit ekspedisiyasının rəhbəri, tarix elmləri doktoru Vəfa Mahmudova məlumat verib. 

Onun sözlərinə görə, Cəlilabad rayonunun Cəfərxanlı kəndində yerləşən Paşatəpə qədim yaşayış məskənində artıq 3 ildir ki, qazıntı işləri aparılır. Hər il abidədən erkən əkinçilik dövrü ilə bağlı çox qiymətli və zəngin materiallar aşkara çıxır:

"Bu il də tapıntılar baxımından məhsuldar oldu. Mədəni təbəqənin sonuncu inşaat qatında çiy kərpicdən tikilmiş evlərin divarlarını, dini ibadət yerini aşkara çıxardıq. Eyni zamanda dulusçuluq kürəsinin həm odunluğunu, həm də paylama kameralarını qeydə aldıq. Daha sonra daha bir dulusçuluq kürəsinin qalıqlarını aşkar etdik. Bununla da abidədə 3-cü dulusçuluq kürəsinin qalıqlarını qeydə almış olduq". 

Mütəxəssis bildirib ki, bu tapıntılar Paşatəpə abidəsinin Neolit dövrünə aid kənd tipli yaşayış yeri olduğunu söyləməyə əsas verir: 

"Həmçinin burada ölkə ərazisində ilk dəfə olaraq kvarsın növlərindən biri olan moriondan hazırlanmış əşyalar aşkar olunub. Maraqlısı budur ki, ölkəmizdə morion yataqları yoxdur. Hesab edirəm ki, bu tipli əşyalar mübadilə əlaqələri nəticəsində buraya gəlib çıxmışdır".

Qeyd edək ki, Paşatəpə qədim yaşayış məskəni 9 min əvvələ aid edılir.
Əvvəllər burada neolit dövrünə aid saxsıdan, sümükdən və dəvəgözü daşından hazırlanmış çoxsaylı məişət, bəzək əşyaları üzə çıxıb. Bundan başqa, bu qədim yaşayış məskənində Azərbaycan tarixində ikinci hesab olunacaq atın əhliləşdirilməsi ilə bağlı nümunələr də aşkar edilib.

Paşatəpə qədim yaşayış məskəni alimlər tərəfindən 1970-ci illərdə qeydə alınıb.