Son dövrlər ölkəmizdə qızılca xəstəliyinə yoluxmaların qeydə alınması virusla bağlı ciddi mübarizə tədbirlərinin həyata keçirilməsinə zəmin yaradıb. Mütəxəssislər və aidiyyəti qurumlar isə mübarizə metodu kimi peyvəndləməni əsas götürür və valideynləri övladlarını virusa qarşı vaksin vurdurmağa çağırır. Məlumata görə, koronavirusun geniş yayıldığı dönəmdə insanların özünütəcrid müddətində olduqları üçün əksər uşaqlar qızılcaya qarşı peyvəndləmədən kənar qalıblar. Ona görə də peyvənddən kənar qalan uşaqların vaksinasiyaya cəlb olunmasının zəruriliyi ölkə əhalisinin diqqətinə çatdırılıb. Amma bəzi valideynlər övladlarına əvvəllər qızılcaya qarşı peyvənd vurdurdub-vurdurmadıqlarını unutduqlarını söyləyir və belə olan zaman nə etməli olduqlarını soruşurlar. Bəs görəsən, uşağa müvafiq peyvəndin vurulub-vurulmadığını müəyyənləşdirmək üçün hər hansısa laborator analiz və ya test mövcuddurmu?

Səhiyyə Nazirliyinin mütəxəssis-eksperti, infeksionist Vasif Əliyev İqtisadiyyat.az-a açıqlamasında bidirib ki, bununla bağlı qan analizi verməyə ehtiyac var. Onun sözlərinə görə, uşağa peyvəndin vurulub-vurulmamasını dəqiq öyrənmək üçün qızılcanın immunoqlobulinin G (igG) səviyyəsinə baxılır: 

"Əgər nəticə pozitivdirsə, bu, ya peyvəndin vurulmasını, ya da uşağın xəstəliyi öncədən keçirdiyini göstərir. Ümumilikdə, bilməyərəkdən ikinci dəfə peyvənd vurdurmağın hansısa əks göstərişi yoxdur. Qızılcada immunoqlobulin G xəstəliyin artıq keçirildiyini göstərir. IgG müxtəlif bakteriyaların, virusların, patogen göbələklərin immun sistem hüceyrələrinə təsiri nəticəsində sintez edilir və orqanizmin həmin patogen amillərə qarşı mübarizəsinə şərait yaradır".

Pediatr Vaqif Qarayev də İqtisadiyyat.az-a açıqlamasında deyib ki, uşağın indi infeksion xəstəliyə yoluxub-yoluxmadığını öyrənmək üçün immunoqlobulin M (igM) testi verilə bilər:

"İmmunoqlobulin G (igG) testinin nəticəsi pozitiv çıxarsa, uşaqda qızılcaya qarşı immunitetin olduğunu göstərir. Bu testləri istənilən şəxs etdirə bilər. Bu peyvənd iki dəfə vurulur. Məqsəd davamlı immunitet almaqdan ibarətdir. Ümumilikdə, qızılcaya qarşı vurulan peyvəndin əks göstəricisi yoxdur. Məsələn, Avropada qızdırmalı uşağa belə peyvənd vururlar. Əslində, bir həkim olaraq, qızdırmalı və allergik uşağa peyvənd vurulmasının tərəfdarı deyiləm". 

V.Qarayev xüsusilə vurğulayıb ki, vaxtında uşaqlara qarşı peyvənd vurulmalıdır: "Valideynlərin peyvənddən boyun qaçırması sadəcə bir bəhanədir. Bəzi valideynlərə isə həqiqətən peyvənd barədə məlumat verilmir. Ona görə də həmin valideynlər uşağına peyvənd vurdurmayıb. Halbuki müvafiq qurumlar mütləq şəkildə maarrifləndirmə işləri həyata keçirməlidirlər".

 

Gülşən Şərif