"Bədən müqaviməti zəif olanlar peyvənd vurdurmamalıdır".

Bunu İqtisadiyyat.az-a açıqlamasında Səhiyyə Nazirliyinin mütəxəssis-eksperti, infeksionist Vasif Əliyev deyib.

Onun sözlərinə görə, qızılca xəstəliyinin spesifik müalicə üsulu yoxdur: "Ona görə də bu xəstəlikdə yalnız dəstək müalicəsi aparılır. Ağırlaşma ehtimalını nəzərə alsaq, qızılcaya yoluxan insanlar xəstəxana şəraitində müalicə almalıdırlar. Qızılca zamanı ikincili bakterial infeksiyalarla ağırlaşmalara daha çox rast gəlinir". 

İnfeksionist vurğulayıb ki, qızılca xəstəliyinə yoluxmamaq üçün ara məsafəsi gözlənilməli, gigiyena qaydalarına əməl olunmalı və xəstə ilə təmasdan uzaq durmaq lazımdır: "Eyni zamanda uşaqlıq dönəmində mütləq şəkildə qızılcaya qarşı peyvənd vurulmalıdır. Peyvənd 1 və 6 yaşında vurulur".

Uşaq vaxtı peyvənd vurdurmayanlar nə etməlidir?

Həkim bildirib ki, hansısa səbəbə görə zamanında peyvənd olunmayanlar hazırkı epidemioloji vəziyyətdə peyvənd vurdura bilərlər: "Belə ki, ilk doza vurulandan 28 gün sonra ikinci dozanı vurdurmaq lazımdır. Bu gün poliklinkalarda peyvənd mövcuddur. Arzu edən şəxslər poliklinkalara müraciət edərək peyvənd vurdura bilərlər".

Həkim onu da vurğulayıb ki, hamilə qadınlar üçün peyvənd vurulması əks göstərişdir.

Gülşən Şərif