Bir neçə gün öncə müəllimlərin sertifikatlaşdırılması imtahanlarının nəticələrinə həsr olunan mətbuat konfransında çıxış edən Elm və təhsil naziri Emin Əmrullayev bildirib ki, ibtidai təhsildəki müəllimlərin böyük əksəriyyəti orta ixtisas təhsillidir. İmtahanlarda 0-29 bal toplayanların 38 faizi də elə orta ixtisas təhsillidir. 

Maraqlıdır ki, təhsil sistemində orta ixtisas təhsilli müəllimlərin çoxluğunun təhsilin keyfiyyətinə hansı təsirləri var?

Mövzu ilə bağlı təhsil eksperti Elçin Əfəndi İqtisadiyyat.az-a açıqlamasında bildirib ki, gələcəkdə bütün müəllimlərin ali təhsilli olması tələb olunacaq:

"Müəllim peşəsində orta ixtisas təhsilini bitirənlərin çox olmasının müəyyən səbəbləri var. Sovet İmperiyasının işğalçı siyasəti dövründə təhsil sisteminə müdaxilələrin edilməsi müəyyən dərəcədə öz təsirini göstərib. Müstəqilliyimizi bərpa edəndən sonra Azərbaycanın təhsil sistemində müəllim qıtlığı yaşandı. Çünki müəllimlərin çoxu müharibə dövründə şəhid oldu. Müəllim qıtlığının olması isə orta ixtisas təhsili bitirənlərin təhsil müəssisələrində çalışmasına yol açdı. Bundan başqa, orta ixtisas müəssisələrində pedaqoji ixtisaslar açıldı". 

Ekspert qeyd edib ki, son illər pedaqojiyönümlü ixtisaslar yığışdırılıb:

"Yalnız bağça müəllimliyi üzrə ixtisaslar mövcuddur.  Düzdür, orta ixtisas təhsilli müəllimlərin arasında öz üzərində çalışanların sayı az deyil. Lakin ümumilikdə orta ixtisas təhsilli müəllimlərin əksəriyyətinin bilik və bacarığı mövcud təhsil sistemi ilə ayaqlaşmır və fəsadlar yaranır. Bu baxımdan bir neçə ildən sonra orta ixtisas təhsilini bitirən şəxslər pedaqoji fəaliyyət göstərməyəcəklər. Məktəblərdə yalnız ali təhsilli şəxslər çalışacaqlar. Bu gün dünyanın əksər ölkələrində, xüsusən də Finlandiyada müəllimlərin hamısı məhz magistr dərəcəsinə də sahibdirlər. Azərbaycanın və Finlandiyanın təhsil səviyyəsini müqayisə etsək, ümumi təhsil göstəricilərinin hansı ölkədə daha yaxşı olduğunu görmək olar".

Gülşən Şərif