Son illər xarici ölkələrə üz tutan azərbaycanlıların sayında artım müşahidə olunur. Kimisi iş dalınca xaricə gedir, kimi təhsil almaq üçün başqa ölkəni seçir, kimisi ailə həyatı qurub Azərbaycanı tərk edir. Bəzi hallarda təhsil üçün xarici ölkəyə gedənlər elə daimi orada qalıb yaşamağa qərar verirlər. Belə bir stereotip formalaşıb ki, insanlar onlar üçün daha komfortlu olan yerlərə getməyə çalışırlar. Lakin reallığa baxanda görmək olar ki, ölkədən gedən bəzi insanların həyatı, güzaranı heç də yaxşı olmur. Əksər hallarda paylaşılan təcrübələr neqativ məzmunlu olur.

Maraqlıdır ki, xarici ölkədə yaşamağa dəyərmi?

Mövzu ilə bağlı sosioloq Lalə Mehralı İqtisadiyyat.az-a açıqlamasında bildirib ki, xarici ölkədə yaşamaq heç də deyilən qədər asan deyil:

"Əslində hər kəs asan qazanc üçün xarici ölkədə yaşam şərtlərinin daha rahat olduğunu düşünür. Bu, "kənardan baxana döyüş asan gəlir" misalını xatırladır. Halbuki heç bir ölkədə asan gəlir mənbəyi yoxdur. Hər bir işdə alın təri, zəhmət tələb olunur. Vətəndaşlarımız xaricdə yaxşı təqaüd alan yaşlı insan gördükdə fikirləşirlər ki, yaxşı qocalıq dövrü yaşayır və dövlət ona yaxşı baxır. Halbuki həmin yaşlı insan gənc vaxtında yaxşı işləyib və onun müqabilini alır. Ölkələrdə sosial vəziyyətlə bağlı müəyyən fərqlər olsa da, kapitalizmin hökmran olduğu dövrdə yaşadığımızı unutmamalıyıq. İnsan əməyi, istismar olmadan heç bir yerdə asan qazanc yoxdur. Azərbaycanda "Green card" udaraq Amerikaya gedən və orada qabyuyan, küçə təmizləyən həmyerlilərimiz var. Hansı ki, Amerikaya gedəndə hər şeyin yaxşı olacağını və rahat bir iş tapacaqlarını düşünürdülər. Əgər insanın peşəsi yoxdursa və yaxşı mütəxəssis deyilsə, hər yerdə eyni cür qarşılanır. Sadəcə insanlara xaricdə həyatın daha asan və gözəl olduğunu təlqin edirlər. Xarici ölkədəki vəziyyət barədə məlumatı olmayan şəxslər deyilənə inanırlar və elə bilirlər ki, dövlət hər şərait yaradır. Xaricdə rahat iş şəraiti əldə etmək üçün uzun zaman, fiziki güc və sağlamlıq lazımdır". 

İqtisad üzrə elmlər doktoru, professor Elşad Məmmədov isə vurğulayıb ki, Qərb ölkələrində rahat həyat yaşamaq üçün bir neçə seçim var:

"Qərbin reklam və təqdim edilməsi nəticəsində ora iṣləməyə gedənlərin həyatlarını müqayisə etsək, maraqlı mənzərənin şahidi olarıq. Unutmaq olmaz ki, Qərb onilliklər ərzində keçmiş Sovet İttifaqında və müstəqil Azərbaycanda baş verənləri qaralamış və qaralamaqda davam edən fəaliyyət göstərib. Xüsusən də Qərbin kütləvi informasiya vasitələri, fondları və spikerləri bu prosesdə aktiv iştirak ediblər. Nədənsə "çiçəklənən Qərb"də yaşamağa və işləməyə gedən həmyerlilərimizin ora əsasən qərb təbliĝatçılarının nifrət etdikləri sovet keçmişindən və müasir Azərbaycandan olan intellektual, peşə sahibi və maddi imkanlarının olması qeyd olunur. Heç kim üçün sirr olmamalıdır ki, ölkədən gedən soydaşlarımız üçün əksər hallarda sadə və aşkar seçim yaranır. Burada əsasən iki seçim yolu var. Vətəndaşlarımız peşələrini, intellektual bacarıqlarını, ruhən və yaradıcılıq baxımından özlərini realizə etmək imkanlarını unudaraq, özlərini primitiv mövcudluğa məhkum etməlidirlər. Digər seçim isə hansısa ictimai və sosial status əldə edərək, Qərb kuratorları qarşısında xal toplamaq naminə öz ölkələrinə, onun ənənə və dəyərlərinə çirkab atmaqdır. Əslində seçim kasad və acınacaqlıdır".

Gülşən Şərif