Son günlər ölkədə qızılcaya yoluxma halları artmaqda davam edir. Hətta azyaşlı və məktəblilər arasında bu xəstəlikdən dünyasını dəyişənlərə də rast gəlinir. Bir neçə gün öncə qızılcaya görə Bakının Qaradağ rayonu ərazisində yerləşən 195 nömrəli tam orta məktəbin ibtidai sinifləri distant tədrisə keçib. Cəmi 14 günlük keçid distant təhsillə bağlı mövzunu yenidən aktuallaşdırıb. Əksər valideynlər yayılan virusla əlaqədar uşaqların sağlamlığını qorumaq üçün tədrisin distant formada davam etdirilməsini dəstəkləyir.

Təhsil eksperti Elçin Əfəndi İqtisadiyyat.az-a açıqlamasında bildirib ki, yalnız yoluxma faktı daha çox qeydə alınan siniflər və ya təhsil müəssisəsi distant təhsilə keçə bilər.

Ölkədə 4200-dən çox dövlət təhsil müəssisəsinin fəaliyyət göstərdiyini xatırladan ekspert bildirib ki, 1 milyon 600 mindən çox şagird təhsil alır. Onun sözlərinə görə, müəllim və işçi heyəti də nəzərə alınarsa, bu sahə üzrə 2 milyondan çox insan təhsilalan, təhsilverən və idarəedən var:

"Bu baxımdan ümumilikdə ölkə səviyyəsində distant təhsilə keçidin tərəfdarı deyiləm. Çünki bu tədris formasında şagirdlərin nəticələri mənfi olur. Ona görə də yoluxma faktı olan siniflər və ya məktəblərin yalnız  7-10 günlük distant təhsilə keçidi daha məqsədəuyğundur".

Elm və təhsil məsələləri üzrə tədqiqatçı Elmin Nuri isə İqtisadiyyat.az-a açıqlamasında bildirib ki, bütün məktəblərin distant təhsilə keçidinə ehtiyac yoxdur:

"Qızılca xəstəliyinə yoluxanların sayının artması təəssüf doğurur. Lakin məktəblərin kütləvi şəkildə bağlanması çıxış yolu deyil. Yalnız qızılca xəstəliyinin aşkarlandığı məktəblərin 2 həftə və ya 10 günlük distant təhsilə keçməsi arzuolunandır. Bir sinifdə şagirdin biri belə qızılcaya yoluxursa, həmin sinif distant təhsilə keçid edə bilər". 

Digər təhsil eksperti Adil Vəliyev isə həmkarlarından fərqli olaraq İqtisadiyyat.az-a açıqlamasında qızılca xəstəliyinə yoluxan şagirdlərin artmaması üçün distant təhsilə keçidin vacibliyini söyləyib. Onun sözlərinə görə, indi yayılan qızılca xəstəliyi əvvəlki dövrlərlə müqayisədə eyni deyil və bu xəstəliyə yoluxan şəxsin qızılca olub-olmadığını yalnız həkim müəyyənləşdirə bilər:

"Qızılca xəstəliyinə yoluxan şagirdlər arasında ölüm faktının olması təəssüf doğurur. Yaxşı olar ki, ölüm faktı qeydə alınmış məktəblər distant təhsilə keçid etsinlər. Kənd məktəblərində şagird sayı kifayət qədər az olduğuna görə yoluxma faktı və fəsadlar çox deyil. Lakin iri şəhər və rayonlarda şagirdlərin sıx olduğu siniflərdə yoluxma faktı daha çox qeydə alınır. Ona görə də vəziyyətin kritik həddə çatmaması üçün daha ciddi addımlar atmaq lazımdır ki, fəsadlar artmasın". 

Gülşən Şərif