Amerikanın “Intel” korporasiyası zərər hesabatını dərc etdikdən və səhm qiymətlərinin düşməsindən sonra mövqeyini yaxşılaşdırmaq üçün müxtəlif variantları araşdırır.

İqtisadiyyat.az xəbər verir ki, bu barədə “Bloomberg” şirkətdəki anonim mənbələrə istinadən məlumat yayıb.

Məlumata görə, cari dövr “Intel” üçün 56 illik mövcudluğu ərzində ən çətin dövr olub. Bunun fonunda korporasiya “Morgan Stanley” və “Goldman Sachs” maliyyə qrupları ilə mövcud vəziyyətdən çıxmaq üçün müxtəlif ssenariləri, o cümlədən məhsulun inkişafı və istehsal biznesinin bölünməsi, eləcə də bəzi layihələrdən imtinanı müzakirə edir. Bankirlər həmçinin bəzi bölmələrinin digərləri tərəfindən birləşməsini və ya alınmasını nəzərdə tutan korporasiya seçimlərini təklif edirlər. Agentliyin mənbələri qeyd edir ki, bütün bu ssenarilərin sentyabrda “Intel” direktorlar şurasının iclasında müzakirə ediləcəyi gözlənilir.

Xüsusilə, korporasiya “Intel”in əsas biznesinə aid olmayan müştərilər üçün çiplər istehsal edən bölmənin satılması variantını müzakirə edir. Agentlik qeyd edir ki, şirkət rəhbərliyi əvvəllər bu biznesə çip istehsalçıları arasında “Intel”in mövqeyini bərpa etmək üçün açar kimi baxırdı.

“Intel” sözçüsü şirkətin maliyyə vəziyyətini yaxşılaşdırmaq planlarını şərh etməkdən imtina edib.

“Bloomberg” xatırladır ki, ilin son rübündə “Intel” 1,61 milyard dollar xalis zərərlə üzləşib və ekspertlər gələn il korporasiyanın maliyyə göstəricilərinin daha da pisləşəcəyini gözləyirlər. Bunun fonunda “Intel” 15 min iş yerini ixtisar etdiyini açıqlayıb. Şirkətin səhmləri bu il artıq 60% dəyər itirib.

Avqustun 2-də “Bloomberg” məlumat verdi ki, “Intel” səhmləri itkilər barədə məlumat verdikdən və iş yerlərini 15% ixtisar etmək planlarını elan etdikdən sonra 20% ucuzlaşıb. Agentliyin məlumatına görə, şirkətin gəliri ötən ilin eyni dövrü ilə müqayisədə 1% azalaraq 12,8 milyard dollar təşkil edib.

“Intel” korporasiyası 1968-ci ildə yaradılıb. Qərargahı Santa Clara-da (Kaliforniya) yerləşir. Korporasiya elektron cihazlar və kompüter komponentləri, o cümlədən mikroprosessorlar istehsal edir. 

Sadiq Cavadov