2050-ci ilə qədər qlobal hidrogen istehsalının 94%-i bərpa olunan enerji mənbələrindən əldə ediləcək.

İqtisadiyyat.az "Anadolu Agentliyi"nə istinadən xəbər verir ki, bu barədə Beynəlxalq Bərpa Olunan Enerji Agentliyinin (IRENA) "Dünya Enerji Keçid Baxışı 2023" hesabatında qeyd olunub.

Məlumata görə, 2022-ci ilin oktyabr ayından etibarən müxtəlif sektorlarda hidrogenin inkişafına dəstək sürətlənib. Bildirilib ki, qlobal temperatur artımını 1,5 dərəcə ilə məhdudlaşdırmaq üçün nəqliyyat, enerji və istehsal sektorlarında elektrikləşdirmə və enerji səmərəliliyi mühüm rol oynayır. Buna görə də bərpa olunan enerji, təmiz hidrogen və davamlı biokütlə tədqiqatlarında artım var.

Keçən il təmiz hidrogen istehsalı və müvafiq texnologiyalar üçün infrastruktur işlərinə 3 dəfədən çox (1,1 milyard dollar) qlobal sərmayə qoyulub. 2050-ci ildə bu sahəyə qoyulacaq ümumi illik investisiyanın 170 milyard dollar səviyyəsində olacağı gözlənilir.

Ssenariyə görə, qlobal enerji təchizatında bərpa olunan enerjinin payının 2020-ci ildəki 16%-dən 2050-ci ildə 77%-ə yüksələcəyi gözlənilir.