Neft İxrac Edən Ölkələr Təşkilatının (OPEC) xam neft hasilatı aprel ayında mart ayı ilə müqayisədə gündəlik 48 min barel azalaraq təxminən 26 milyon 580 min barelə enib.

İqtisadiyyat.az xəbər verir ki, bu barədə OPEC-in aylıq neft bazarı hesabatında deyilir.

Aprel ayında Konqo və İranda xam neft hasilatı artıb, Nigeriya, İraq və Venesuelada isə azalıb. Gündəlik neft hasilatı Nigeriyada 46 min barel, İraqda 32 min barel, Venesuelada 13 min barel azalıb. Eyni dövrdə Konqoda neft hasilatı 21 min barel, İranda isə 14 min barel artıb. Qrupun ən böyük istehsalçısı olan Səudiyyə Ərəbistanında hasilat keçən ay 2 min barel artıb.

Hesabata görə, bu il qlobal neft tələbinin 2 milyon 250 min barel artaraq 104 milyon 460 min barelə çatacağı təxmin edilir.

Ötən ay dünyada qazma quyularının sayı isə 60 ədəd azalaraq 1797-yə enib. Qazma qurğularının sayı OPEC ölkələrində 4 ədəd, qeyri-OPEC ölkələrində isə 56 ədəd azalıb.

 

Gözəl Həşimova