Braziliya, Rusiya, Hindistan, Çin və Cənubi Afrika Respublikasından ibarət BRİCS təşkilatının Yohannesburqda keçirilən 15-ci sammitində 2-ci Yohannesburq Bəyannaməsi qəbul edilib.
İqtisadiyyat.az xəbər verir ki, bəyannamədə ədalətli beynəlxalq nizam və çoxqütblü sistemin formalaşdırılması, davamlı inkişaf üçün BRİCS ölkələri arasında əməkdaşlığın vacibliyi vurğulanıb.
Bəyannamədə inkişaf etməkdə olan ölkələrin BMT-də, o cümlədən Birləşmiş Millətlər Təşkilatının Təhlükəsizlik Şurasında (BMT TŞ) daha çox təmsil olunması məqsədəuyğun hesab edilib.
COVID-19-un qlobal iqtisadiyyata dağıdıcı təsirinin aradan qaldırılması, çoxtərəfli iqtisadi siyasətlərdə qlobal konsensusa nail olmaq üçün addımlar atılmasının vacibliyi vurğulanıb.
BRİCS-in 2030-cu ilə qədər Dayanıqlı İnkişaf Gündəliyinin həyata keçirilməsi çağırışı təkrarlanıb və gələn ay Nyu-Yorkda keçiriləcək Dayanıqlı İnkişaf Məqsədləri Sammitinin bu baxımdan mühüm imkanlar yaratdığına diqqət çəkilib.
Həmçinin Braziliyanın COP30 iqlim dəyişikliyi sammitinə ev sahibliyi etmək üçün namizədliyinin müsbət qarşılandığı və iqlim dəyişikliyinə qlobal reaksiyanın mühüm olduğu qeyd edilib.
Bəyannamədə üzv ölkələr arasında yerli valyuta ilə alış-verişi nəzərdə tutan müqavilələrin əhəmiyyəti vurğulanaraq, yerli valyutalardan istifadənin təşviq edilməsinin zəruriliyinə diqqət çəkilib.
Həmçinin qeyd olunub ki, Yeni İnkişaf Bankı (NDB) üzv ölkələrin infrastrukturunun və davamlı inkişafının təşviqində mühüm əhəmiyyət kəsb edir.
