ABŞ-nin müdafiə naziri Lloyd Ostin və dövlət katibi Entoni Blinken Yaponiyanın müdafiə naziri Minoru Kihara və  xarici işlər naziri Yoko Kamikava bazar günü Tokioda hərbi əməkdaşlığın gücləndirilməsinə yönəlmiş 2+2 formatında məsləhətləşmələr aparacaqlar.

İqtisadiyyat.az bu barədə “Associated Press”ə ( AP) istinadən xəbər verir.

Məlumata görə, xüsusilə, tərəflər Çin tərəfindən artan təhlükə fonunda ABŞ silahlı qüvvələrinin komandanlığı və nəzarətinin müasirləşdirilməsi və Amerika lisenziyası ilə Yaponiyada raket istehsalının genişləndirilməsi məsələlərini müzakirə edəcəklər.

Agentlik qeyd edir ki, nazirlər ilk dəfə olaraq ABŞ-nin nüvə silahları da daxil olmaqla “uzadılmış çəkindirmə” öhdəliyini təsdiqləmək üçün ayrıca danışıqlar aparacaqlar.

AP yazır ki, nazirlərin komandanlıq səlahiyyətinə malik daha yüksək rütbəli zabitləri cəlb etməklə Yaponiyadakı ABŞ ordusunun komandanlıq və nəzarət strukturlarının modernləşdirilməsi planlarını müzakirə edəcəkləri gözlənilir.

Məlumatda deyilir ki, Yaponiya silah ixracına qoyulan məhdudiyyətləri əhəmiyyətli dərəcədə yüngülləşdirib və dekabr ayında ABŞ-nin ehtiyatlarını gücləndirmək üçün Amerika lisenziyası əsasında Yaponiyada istehsal olunan “PAC-3” raketləri ilə bağlı ABŞ-nin tələbini təsdiqləyib.

Nazirlərin ABŞ-yə ixrac üçün bu raketlərin istehsalının mümkün artırılmasını da müzakirə edəcəyi gözlənilir.

Agentlik bildirib ki, Yaponiyanın Baş naziri Fumio Kişida ilə ABŞ Prezidenti Co Bayden arasında aprel razılaşmasından sonra Yaponiya və ABŞ müdafiə sənayesi sahəsində əməkdaşlığı gücləndirib.