Dövlət Statistika Komitəsinin məlumatına görə, ötən il əmanətlərin 65,8 faizi milli, 34,2 faizi xarici valyutada qoyulub. Beləliklə, milli valyutada olan əmanətlərin məbləği əvvəlki ilin eyni dövrü ilə müqayisədə 16,3 faiz artıb, xarici valyutada qoyulmuş əmanətlərin məbləği isə 4,8 faiz azalıb. 

İqtisad üzrə elmlər doktoru, professor Elşad Məmmədov İqtisadiyyat.az-a açıqlamasında bildirib ki, kommersiya banklarında manatla olan əmanətlərin həcminin artması gözləniləndir. 

Onun sözlərinə görə, son zamanlar dolların özünün də dəyərdən düşməsi insanlarda bu xarici valyutaya qarşı inamsızlıq yaradıb:

"Xeyli müddətdir ki, kommersiya bankları xarici valyuta ilə ifadə olunan depozitlər üzrə faiz dərəcələrini milli valyuta ilə müqayisədə xeyli dərəcədə aşağı təklif edirlər. İnflyasiyanı nəzərə aldıqda, o cümlədən dolların dəyərdən düşməsi fonunda depozitlər üçün iqtisadi cəhətdən effektiv vəziyyət yaranır. Manatla qoyulan əmanətlərin daha sərfəli olması baxımından depozit yerləşdirən vətəndaşlarımız milli valyuta ilə depozit qoyuluşuna üstünlük verirlər".

E.Məmmədov hesab edir ki, ölkəmizdə xarici valyuta ilə əmanət qoyuluşundan tamamilə uzaqlaşmaq lazımdır. Onun sözlərinə görə, bu, pul dövriyyəsində manatın dollar tərəfindən sıxışdırılmasının qarşısını alacaq:

"Son günlər bir sıra banklar xarici valyuta ilə ifadə olunan depozitlərdə faiz dərəcələrinin artması istiqaməti üzrə müəyyən işlər görürlər. Ona görə də yaxın zamanlarda yeni yanaşmalar tətbiq oluna bilər. Bütün hallarda dollarla əmanət qoyuluşunu manatla qoyulan depozit səviyyəsi ilə uyğunlaşdırmaq mümkün olmayacaq. Müvafiq qanunvericilik bazasına görə, ölkədə alıcılıq qabiliyyətinə malik olan pul dövriyyəsi vəsaiti kimi manat çıxış edir. Depozitlərin məhz manatla qoyuluşu iqtisadi və siyasi cəhətdən daha məqsədəuyğundur".

Gülşən Şərif