İsrailin müdafiə naziri Benni Qants Baş nazir Benyamin Netanyahuya ultimatum verərək, Qəzza münaqişəsinin həlli ilə bağlı razılaşdırılmış vizyona sadiq qalmasını, o cümlədən, HƏMAS-ın məğlubiyyətindən sonra Qəzzaya kimin rəhbərlik edəcəyinə dair qərar verməsini tələb edib. Bunlar baş verməsə, koalisiyadan çıxacağı barədə xəbərdarlıq edib.

İqtisadiyyat.az xəbər verir ki, bu barədə "Times of Israel" məlumat yayıb.

Qantsın sözlərinə görə, hərbi kabinet "altı strateji məqsədə" nail olmaq üçün fəaliyyət planını formalaşdırmalı və təsdiq etməlidir.

Xüsusilə, girovların vətənə qayıtması, HƏMAS hakimiyyətinin devrilməsi, Qəzza zolağının demilitarizasiyası və təhlükəsizlik sektoru üzərində İsrail nəzarətinin yaradılmasından bəhs edilir.

Qantsa görə, bununla yanaşı, İsrailin təhlükəsizlik nəzarəti Qəzza üçün Amerika, Avropa, Ərəb və Fələstin elementlərini özündə birləşdirən beynəlxalq mülki idarəetmə mexanizmi yaratmalıdır ki, bu da HƏMAS və Fələstin prezidentindən fərqli gələcək alternativ üçün əsas olacaq.