“Proqnozlar növbəti il üçün qızılın qiymətinin 2000 dolların üzərində olacağını göstərir”.

Bunu iqtisadçı-ekspert Xalid Kərimli İqtisadiyyat.az-a açıqlamasında deyib.

O, birjada bütün əmtəələr, səhmlər, kriptovalyutaların gün ərzində müəyyən dalğalanma ilə qiymətləri dəyişdiyini, qızılın qiymətində isə xüsusən də pandemiyadan sonra artımın olduğunu xatırladıb:

Ekspert bildirib ki, son dövrlər qızılın qiymətində bahalaşma iki səbəblə izah edilə bilər: “Risklərin artması, yəni Rusiya – Ukrayna və Yaxın Şərqdə gedən proseslər. Eləcə də inflyasiyanın getdikcə zəifləməsi, yəni dolların ucuzlaşması. Bütün bunlar qızıla marağı artırdı. Proqnozlar növbəti il üçün qızılın qiymətinin 2000 dolların üzərində olacağını göstərir. Son dövrlərdə, xüsusilə də pandemiyadan sonra qızılın qiymətində artım müşahidə olunur”.

İqtisadçının sözlərinə görə, hazırda birjadakı dəyişikliklərin Azərbaycan bazarına təsir göstərməsi üçün bir neçə ay keçməlidir: “Çünki qızıl zərgərlik məmulatlarının xammalıdır. Zərgərlərin qızılı alıb emal etməsi və daha sonra mağazaya yerləşdirməsi üçün müəyyən müddət tələb olunur. Bu baxımdan qızılın qiymətinin indi 1700-1800 dollardan 2000 dollarlıq səviyyəyə qalxması təqribən 10-15%  artım deməkdir. Bu da qızıl bazarına tədricən öz təsirini göstərəcək”.

Azərbaycan Zərgərlər Assosiasiyasının sədri Toğrul Abbasquliyev isə İqtisadiyyat.az-a açıqlamasında son dövrlər qızılın qiymətində 1-2 dollarlıq fərqin olduğunu söyləyib.

O, bunun məmulatlara çox cüzi formada təsir göstərdiyini deyib.

T.Abbasquliyev bildirib ki, zərgərlik formalarının qiymətini formalaşdıran iki amil var: “Qızılın birja qiyməti və işçilik - bunlar zərgərlik formalarının qiymətini formalaşdıran amillərdir. Əsas pay qızılın öz xammal qiymətidir. Ümumiyyətlə, zərgərlik bazarı birja qiymətinə görə tənzimlənir. Hazırda 999 əyarlı qızılın bir qramı 64 dollar civarındadır. Pandemiyaya qədər isə bu rəqəm 38-42 dollar arasında dəyişirdi”.

T. Abbasquliyev bu gün qızıl bazarında dövriyyələrin artım tempi ilə qalxdığını vurğulayıb: “2021-ci ildən müəyyən gömrük və vergi güzəştləri tətbiq edildi. 2019-cu ildə bazarın dövriyyəsi 32 milyon idisə, hazırda proqnozlarımıza görə, bu ilin sonuna 250 milyona çatacaq. Keçən il isə bazarın dövriyyəsi 153 milyon idi. Biz çalışırıq ki, real vəziyyətə uyğun fəaliyyət göstərək. Bu gün reallıq ondan ibarətdir ki, 999 əyarlı qızılın bir qramı 64 dollar civarındadır. Bəli, mən də qızılın bir qramının 70 dollara qədər qalxacağı ilə bağlı proqnozları oxuyurdum. Əgər qalxsa, təbii ki, biz bunu qiymətlərdə hiss edəcəyik. Amma qiymətlərin qalxıb-qalxmayacağını zaman göstərəcək”.

Sadiq Cavadov