Günün gözəllik tələblərinə uyğun olaraq insanlar zaman-zaman estetik əməliyyatlara müraciət edirlər. Əvvəllər bu sahəyə böyük axın vardı. Bəs hazırda vəziyyət necədir? Görünüşünü dəyişdirmək ehtiyacı hiss edənlərin sayında dəyişiklik varmı?

Mövzu ilə bağlı İqtisadiyyat.az-ın suallarını cavablandıran kosmetoloq Şahnaz Səmədova estetik müdaxilələrə tələbatın günü-gündən artdığını söyləyir: “Xüsusilə xanımlar burun korreksiyası, dodaq, yanaq korreksiyası və oval üçün müraciət edir. Əvvəllər daha çox orta yaşlı insanlar müraciət edirdisə, son vaxtlar gənclərin sayında artım var. Bir də məsləhətdir ki, xanımlar üz cizgilərini xırda toxunuşlarla dəyişsinlər. Qabarıq müdaxilədən və eyniləşmədən qaçsınlar. Bu mümkündür kosmetologiyada”.  

Kosmetoloqun sözlərinə görə, müraciət edənlər arasında bəylərin də sayı az deyil: “Bəylər əsasən saç tökülməsinin müalicəsi, burun korreksiyası, buxaq liftinqi istəyir. Eyni zamanda dolğu və botoks üçün müraciət edənlər də var. Dolğu əsasən burun korreksiyası, oval korreksiyası və çənəni irəliyə gətirmək üçün istifadə olunur. O ki qaldı botoksun istifadəsinə, alın-qaş arası, gözətrafı qırışların açılması kimi estetik müdaxilələrdə botoksdan istifadə edirik”.

Plastik-cərrah Elşən Nəsibov isə bəzi pasientlərin bu sahədən məlumatsız olduqlarına diqqət çəkib: “Baxırsan ki, 18-20 yaşı var, göstəriş oldu, olmadı, gəlib blefaroplastika istəyir, üzgərmə istəyir. O demək deyil ki, bunların hamısının istəyini biz tam şəkildə həyata keçirməliyik. Xeyr. Amma onu demək olar ki, müraciət edən əksər gənclər rinoplastika əməliyyatı istəyində olur”.

Estetik əməliyyatların çoxsaylı səbəblərindən biri də insanların yaşlanmaqdan, yaşlı görünməkdən qorxmasıdır. Buna görə də xeyli cavanlaşma üsulları təklif olunur.  Kosmetoloq qapısında növbə tutan qadınlar, üz-özünə “əl gəzdirən” bəylərin isə sayı artmaqdadır. E.Nəsibov bu məsələ ilə bağlı da fikirlərini bölüşüb: “Nə qədər plastik əməliyyatlara məruz qalmış olsalar da, müəyyən yaşdan sonra dərimizdə qocalma prosesi baş verir və bundan qaçmaq mümkün deyil. Yəni yaşa dolduqca dərinin elastikliyi, kollagenliyi azalmış olur, bədənin müxtəlif nahiyələrində qırışlar əmələ gəlir. Ki, bu da bizim yaşımızı göstərən bir faktdır”. 

Bəs insan ömrünün elə bir yaş həddi varmı ki, o yaşdan sonra estetik əməliyyatlar gözlənildiyi qədər effekt verməyə bilər? Sən demə varmış. Plastik-cərrah Elşən Nəsibov belə düşünür: “40 yaşdan sonra rinoplastika əməliyyatı, bir çox hallarda effekt vermir. Ona görə də burun əməliyyatını daha gənc yaşda etdirmək daha məqsədəuyğundur. Bir də bəylər arasında üzdartma əməliyyatı istəyənlər olur. Amma çox az, yəni il ərzində 4-5 nəfəri keçmir. Bu cür estetik müdaxiləyə daha çox qadınlar maraq göstərir”. 

Bu mövzuda bir də psixoloji faktorlar var. Psixoloq Ruhiyyə Rüstəmova hesab edir ki, uşaqlıq travmaları da bu məsələdə rol oynayır: “Hansı qadınlar özlərindən narazıdırlar? Güzgüyə baxdıqda özlərində çəki artımı müşahidə edən, yaxud üzlərində hansısa bir qüsur görən qadınlar. Bir də uşaqlıq travması burada öz sözünü deyir. Məsələn, bəzən uşaqlıqda valideyn tərəfindən çox təriflənməyən, yaxud cəmiyyətdə bulinqə məruz qalan uşaqlar böyüyüb özlərini daha yaxşı dərk etdikcə, xarici görünüşlərində müəyyən defektlər axtarıb tapır və əlbəttə ki, dərhal estetik əməliyyatlara müraciət edirlər”.

Gözəl görünmək hər kəsin haqqıdır. Amma gözəllik və yaraşıqlı görünmək naminə sağlamlığımızı təhlükə altına atmaq yolverilməzdir. Sağlamlığımız bahasına başa gələn gözəl görünüş heç vaxt xoşbəxtlik gətirməz.