Bakı Nəqliyyat Agentliyi Bakıda yanan sərnişin avtobusu ilə bağlı yayılan xəbəri təkzib edib. İqtisadiyyat.az xəbər verir ki, bu barədə BNA-nin mətbuat katibi Mais Ağayev şəxsi feysbuk profilində məlumat paylaşıb.

"21.03.2019 tarixində “BakuBus” MMC-yə aid iki sərnişin avtobusunun iştirakı ilə yol nəqliyyat hadisəsi baş verib. Hadisə səhər saat 6 radələrində avtobuslar Yasamal rayonu istiqamətində başlanğıc dayanacağa gedərkən Nəsimi rayonu Ü.Hacıbəyov küçəsində qeydə alınıb. Hadisə zamanı avtobuslarda sərnişin olmayıb, sürücülər isə xəsarət almayıb. Ehtiyyat tədbiri üçün hadisə yerinə ərazi üzrə Nəsimi rayon Dövlət Yanğından Mühafizə hissəsinin briqadası gəlsədə, hər hansı bir yanğın hadisəsi qeydə alınmayıb.
Qeyd edilənlərə əsasən bildiririk ki, “İveco” markalı sərnişin avtobusunun yanması ilə bağlı yayılan məlumatlar həqiqətə uyğun deyil və mövcud hadisənin təhrif olunmasıdır.
Bunu nəzərə alaraq KİV-dən bu xarakterli məlumatlar hazırlayan zaman Bakı Nəqliyyat Agentliyinin mətbuat xidməti ilə əlaqə saxlamalarını xahiş edirik".

Xatırladaq ki, "BakuBus"-a məxsus "İveco" markalı avtobusun mühərrik hissəsində yanğın olması ilə bağlı məlumatı FHN yaymışdı.