Xəbər verdiyimiz kimi, bu gün səhər saatlarında Gəncə şəhərində şagird məktəbin qarşısında qətlə yetirilib. Gəncə şəhər M.P.Vaqif adına 8 nömrəli tam orta məktəbin şagirdi Raul Rəhimov 2007-ci il təvəllüdlü Fərid Şabanov tərəfindən bıçaqlanıb. O, xəstəxanaya aparılsa da vəfat etdiyi məlum olub. Məlumata görə, qətli törətməkdə şübhəli bilinərək saxlanılan F.Şabanov hadisədən əvvəl məktəbə daxil olmağa çalışıb. Lakin məktəbin məsul şəxsləri onun məktəb binasına daxil olmasına icazə verməyiblər. O, məktəbdən çıxarılarkən əsəbi halda şagirdlərlə mübahisə edib. Həmin vaxt dərsə gələn şagird Raul Rəhimov ilə də onun arasında münaqişə yaranıb. Mübahisə zamanı kənar şəxs Raul Rəhimova bıçaq xəsarəti yetirib. Hadisəni törədən şəxsin 10-cu sinifdə təhsilini yarımçıq dayandırdığı açıqlanıb. Bildirilib ki, o, valideynin ərizəsi əsasında orta məktəbdəki təhsilini dayandırıb və ondan sonra heç bir məktəbdə təhsilinə davam etməyib.
Bəs məktəblilər arasında baş verən belə cinayətlər nədən qaynaqlanır?
Təhsil məsələləri üzrə ekspert Kamran Əsədov İqtisadiyyat.az-a açıqlamasında təəssüflə deyib ki, şagirdlər arasında cinayətkar aləmə meyil hədsiz dərəcədə artıb. Onun sözlərinə görə, bəzi hallarda şagirdlər arasında bu gün özlərini oğru aləmi və bu kimi digər şəxslərə oxşatmaq istəyənlərə rast gəlinir:
"Bu gün Azərbaycanın 4432 orta ümumtəhsil məktəblərində 1,6 milyon şagird təhsil alır. Təəssüflər olsun ki, bu gün bir qisim Azərbaycan məktəblisi özünü bu və ya digər proseslərin fonunda kriminal şəxslər kimi aparırlar. Bu onu göstərir ki, kriminal aləmin daha çox populyar olduğu yerlərdə şagirdlərlə məktəblərin kommunikasiyası düzgün tənzimlənməyib. Bəzi hallarda kənar şəxslər məktəbin qarşısına gəlir və yaxud da avtomobillə bu və ya digər qanunsuz hərəkətlərə yol verir. Onların bəziləri özlərini məktəbdə sanki oğru aləminin tanınmış simalarıymış kimi təqdim edirlər. Nəticədə bu tipli bədbəxt hadisələr baş verir".
Bundan əvvəllər də şagirdlərin iştirakı ilə bıçaqlanma hadisələrinin baş verdiyini xatırladan ekspert bildirib ki, belə hallardan qorunmaq üçün ciddi maarifləndirmə və cəza tədbirləri görülməlidir:
"Əslində, biz dəfələrlə təklif etmişik ki, məktəblərin qarşısında post patrul xidmətinin əməkdaşları mütəmadi olaraq xidmət aparmalıdırlar. Bu gün məktəblərin, demək olar ki, hər birində şagirdlərlə iş istiqamətində problemlər mövcuddur. Xüsusən də məktəblərin psixoloji sistemini qeyd edə bilərik. Müəyyən psixoloji problemləri olan uşaqlar var. Onlar öncədən müəyyənləşdirilməlidir. Davaya meyilli, özünüdavranış qaydalarında problemi olan uşaqları məktəb müəyyənləşdirməli və onlara nəzarət etməlidir".
