Gürcüstan Prezidenti Salome Zurabişvili parlament seçkilərində saxtakarlıqlarla bağlı verdiyi açıqlamalara görə istintaqa çağırılıb. Prokurorluqdan açıqlanıb ki, o, 2024-cü il parlament seçkilərində mümkün saxtakarlıqla bağlı sübutlara malik olmalıdır.
İqtisadiyyat.az-ın məlumatına görə, görünən budur ki, Gürcüstan Prokurorluğu digər istintaq hərəkətlərini həyata keçirəcək. Bütün bu tədbirlər MSK-nın bəyanatında göstərilən faktlar əsasında aparılacaq. Çünki siyasətçi MSK-nı saxtakarlıqda ittiham edərkən bu faktlara istinad edib.
Seçkilərdən sonra Gürcüstan MSK Prokurorluğa müraciət edib. Səsvermə günündə, oktyabrın 26-da MSK sədri Georgi Kalandarişvili naməlum şəxslərin seçki komissiyası üzvlərinin səssizliyi altında bülleten dəstələrini qutuya atdıqları bir videonun səbəb olduğu saxtakarlıq şübhəsinə görə cinayət işi açıldığını bildirib. Seçki kampaniyasından sonra Gürcüstan MSK bülletenləri iki dəfə yenidən yoxlayıb və seçkilərin mümkün saxtakarlıq hallarının araşdırılması üçün Baş Prokurorluğa müraciət edib. MSK-nın bəyanatında qeyd olunur ki, qurum Prezident və bəzi müxalif siyasətçilər tərəfindən xüsusi hücumlar və əsassız tənqidlər hədəfinə çevrilib.
Gürcüstan Prezidentinin prokurorluqda ifadə vermək üçün çağırıldığı bildirilib ki, saxtakarlıq faktını təsdiqləyə bilsin. Baş nazir İrakli Kobaxidzenin fikrincə, əgər Zurabişvili ifadə verməkdən imtina edərsə, bu, onun sözlərinin və müxalifətin seçkilərdə saxtakarlıqla bağlı iddialarının yalan olduğuna sübut olacaq.
Bu arada prezident parlament seçkilərini tanımaqdan imtina edib. Zurabişvili ölkədəki parlament seçkilərinin tam saxtalaşdırıldığını bəyan edib. Bunun fonunda o, səsvermənin nəticələrini və “Gürcü Arzusu” partiyasını təbrik etməyi rədd edib. “Bu gün burada deyirəm ki, ölkədə qalan yeganə müstəqil institut kimi mən bu seçkiləri tanımıram”,- deyə bildirib. O, seçkilərdə “səslərin tamamilə oğurlandığını” vurğulayıb və bu hadisəyə etiraz olaraq mitinq təşkil edəcəyini açıqlayıb.
“Gürcü Arzusu” seçkilərdə səslərin yarısından çoxunu toplayıb. Oktyabrın 27-də MSK parlament seçkilərinin nəticələrini 99 faiz bülletenlər işlənildikdən sonra açıqlayıb. Nəticələrə görə, 2012-ci ildən bəri hakimiyyətdə olan “Gürcü Arzusu” partiyası səslərin 54,2 faizini toplayıb.
Bundan əlavə, parlamentə keçid üçün tələb olunan həddi dörd müxalifət partiyası da keçib – “Dəyişikliklər Koalisiyası” (11 faiz), “Vahid Milli Hərəkat” (10,1 faiz), “Güclü Gürcüstan” (8,8 faiz) və “Gaxariya Gürcüstan üçün” (7,7 faiz). Müxalifət isə səsvermənin nəticələrini tanımaqdan imtina edib.
"Edison Research" şirkətinin keçirdiyi eksit-poll da “Gürcü Arzusu”nun məğlubiyyətini göstərib. Sosioloqların məlumatlarına görə, “arzular” 40,9 faiz səs topladığı halda, müxalifət partiyaları ümumilikdə 51,9 faiz səslə 83 mandat qazanıb, rəqiblər isə 67 mandat əldə ediblər.
Baş verənlər onu göstərir ki, Gürcüstanda rəngli inqilab riski istisna deyil. Qərb ölkələrinin “Gürcü Arzusu”nun qələbəsindən sonra Gürcüstanda inqilab həyata keçirməyə çalışacağı müzakirə olunan məsələlərdəndir. Çünki müxalifət hakim partiyanın qələbəsi ilə heç bir halda razılaşmayacaq.
Böyük ehtimal var ki, seçki nəticələrinə zorakı yolla etiraz etmək, Qərbdə tərəfindən növbəti rəngli inqilaba cəhdlər olacaq. Onu da nəzərə almaq lazımdır ki, hələ seçki ərəfəsində ABŞ və Avropa İttifaqı səfirləri seçkilərə fəal şəkildə müdaxilə edirdilər, Qərb müşahidəçiləri isə ya susurdular, ya da faktiki və ya ehtimal olunan pozuntulara istinad edərək nəticələri tanımırdılar.
Zurabişvilinin hazırda müxalif düşərgənin lideri kimi çıxış etməsi onun həbsdə olan sabiq prezident Mixail Saakaşvili kimi sonunun nəticələnə biləcəyi ehtimallarını ortaya qoyur. Nəzərə almaq lazımdır ki, prezident prokurorluğa ifadə verməkdən də imtina edir. Əgər ona qarşı dəlillər sübuta yetirilsə və əlavə ittihamlar olarsa, bu ehtimal heç də istisna deyil.
Davud Hüseynli
