Türkiyənin Kahramanmaraş vilayətində baş verən iki dəhşətli zəlzələ hadisəsi minlərlə tikilinin dağılmasına, 13 minə yaxın insanın həyatını itirməsinə, on minlərlə insanın yaralanmasına səbəb oldu. Hadisə baş verdiyi andan etibarən dünya ölkələrindən Türkiyəyə yardım təklifləri gəldi. 

İlk təklif Azərbaycandan gəldi. Üstəlik sadəcə təklif olaraq qalmadı. Azərbaycan dövləti prezident İlham Əliyevin tapşırığı əsasında ilkin mərhələdə 420 nəfərlik xilasetmə qrupu və xüsusi təlim görmüş itləri qardaş ölkəyə göndərdi. Bunun ardınca 20 tır humanitar yardım göndərildi. Bununla da kifayətlənməyən Azərbaycan sonrakı günlərdə 41 nəfərdən ibarət peşəkar tibbi və qeyri-tibbi personal və mobil səhra hospitalını da Türkiyənin zəlzələdən zərər görmüş bölgələrinə göndərdi. Azərbaycanın yardımları bundan sonra da davam edəcək. 

İndi isə zəlzələdən sonra yardım göndərən digər ölkələrin siyahısına baxaq. 

Fransa Türkiyəyə 136 nəfərlik iki xilasetmə qrupu göndərib. Qrupun tərkibində xüsusi təlim görmüş 10 it də yer alıb. Bundan əlavə Fransada yaşayan türklər də müxtəlif humanitar yardım yükləri göndərməkdədir. 

İspaniya zəlzələ bölgəsinə səhra xəstəxanası quraşdırılması üçün 70 nəfərlik xüsusi qrup göndərib. Qrupun 40 nəfəri tibbi personalı təşkil edir. 10 nəfər logistika mütəxəssisidir. Qurulan mobil xəstəxana gündəlik 150-200 nəfər xəstəyə baxa biləcək, 20 nəfəri isə yatılı olaraq saxlaya biləcək gücə sahibdir. Bundan başqa axtarış-xilasetmə işlərinə ayrıca 90 nəfərlik qrup da göndərilib. 

Almaniya beynəlxalq axtarış-xilasetmə təşkilatı olan ISAR-dan heyət göndərib. Rəsmi Berlin Türkiyəyə ayrıca generator, çadır və yorğan-döşək vasitələri də göndərib. Humanitar yardım işinə Almaniyada yaşayan türklər də qoşulub və ümumilikdə 80 tonluq humanitar yardım yükü Türkiyəyə çatdırılıb. 

Yunanıstan Qızıl Xaç cəmiyyəti zəlzələ baş verən ərazilərə təməl qida məmulatları, yataq dəstləri və təmizlik vasitələri göndərib. Bundan başqa 21 xilasedici, 5 həkim, 3 təcili tibbi yardım personalı və iki xüsusi təlim görmüş itdən ibarət heyət xüsusi təyyarə ilə Türkiyəyə gəlib. Yunanıstanlı xilasedicilər dünən 6 yaşlı bir uşağı dağıntılar altından sağ çıxarıblar.

İtaliya 50 xilasedici və 10 nəfər təcili tibbi yardım personalından ibarət heyəti hərbi təyyarə ilə Türkiyəyə göndərib. 

Böyük Britaniya xüsusi təlim görmüş itlərin də yer aldığı 76 nəfərlik xilasetmə qrupunu Türkiyəyə yollayıb. 

Belçika 80 nəfərlik tibbi personalı və bir səhra xəstəxanasını Türkiyəyə göndərib. 

Çexiya da Türkiyəyə öz xilasedici heyətini göndərən ölkələr sırasındadır.

Niderlandın 65 nəfərlik xilasedici heyəti və 8 xüsusi təlim görmüş it də Türkiyənin yardımına gəliblər. 

Maltanın Türkiyəyə göndərdiyi xilasetmə qrupu 32 nəfərlik xilasedicidən və bir ədəd xüsusi təlim görmüş itdən ibarətdir. 

Macarıstan Türkiyəyə 7 fərqli qrup göndərib. Ümumilikdə 125 nəfər xilasedici və 22 xüsusi təlim görmüş it Hatay və Antakyada axtarış-xilasetmə işlərinə cəlb olunub. Rəsmilərin məlumatına görə, macarıstanlı xilasedicilərin sayı 156-ya, itlərin isə sayı 28-ə çatacaq. 

Polşa da yardım göndərən ölkələr sırasındadır. 76 nəfər xilasedici və 8 xüsusi təlim görmüş it Adıyamanın 10 fərqli hissəsində iş başındadır. 

Bolqarıstan hadisədən dərhal sonra 59 nəfərlik xilasetmə qrupu göndərib. Onlar Adanadakı dağıntılarda axtarışlar aparmaqdadır.

Serbiya Türkiyəyə müxtəlif gigiyenik vasitələrdən ibarət humanitar yardım göndərib

Monteneqro da Türkiyəyə humanitar yardım göndərən ölkələr sırasındadır. Bunu da orada yaşayan türklər həyata keçiriblər.

Bosniya və Herseqovina 25 nəfərlik xilasetmə qrupu ilə Türkiyəyə yardım əlini uzadıb.

ABŞ Beynəlxalq İnkişaf Agentliyinin Humanitar ofisi (USAID) 161 peşəkar xilasedici və 12 xüsusi təlim görmüş itdən ibarət qrupu Türkiyəyə göndərib. 

Meksika prezidenti Andres Manuel Lopez Obradorun tapşırığı ilə 145 nəfərlik axtarış-xilasetmə qrupu və 16 xüsusi təlim görmüş it Türkiyəyə yollanıb. 

İran XİN Hüseyn Əmir Abdullahiyanın göstərişi ilə İran Qızıl Aypara cəmiyyətinə məxsus 6 qrupdan ibarət axtarış-xilasetmə qrupunu və tibbi personalı Türkiyəyə göndərilib. Rəsmi Tehran Türkiyəyə çadır və qida paketi daşıyan təyyarə də göndərib.  

İsrail hökumətinin təlimatı ilə 150 nəfərdən ibarət heyət 2 gün əvvəl Türkiyəyə gələrək axtarış-xilasetmə işlərinə başlayıb. Xilasedicilərin yeni qrupları da Türkiyəyə gəlməkdədir. 

Özbəkistan hökumətinin təlimatı ilə 100 nəfərlik axtarış-xilasetmə qrupu da Türkiyədə iş başındadır.

Əfqanıstanda Taliban rejimi Türkiyə və Suriyaya 165 min dollar yardım ediləcəyini bəyan edib. 

Pakistan hökuməti zəlzələ baş verən günün səhəri 50 nəfərlik xilasetmə qrupu və 25 tonluq humanitar yardımı Türkiyəyə göndərib. Üstəlik ölkənin baş naziri Şahbaz Şərifin tapşırığı ilə nazirlər kabinetinin bütün üzvlərinin bir aylıq maaşları və bütün dövlət qulluqçularının maaşlarının bir günlük miqdarı Türkiyə üçün yaradılan yardım fonduna keçiriləcək. 

Gürcüstan iki mərhələdə toplam 100 nəfərlik xilasetmə qrupu göndərib. Heyət Adıyaman bölgəsindəki xilasetmə işlərinə cəlb olunub.  

Ermənistan da Türkiyəyə xilasedici qrup göndərən ölkələr sırasındadır. Bu ölkə həmçinin Suriyaya da humanitar yardım göndərib. 

Rusiya da ilk xilasetmə qrupu göndərən ölkələr sırasındadır. Dünən daha 50 nəfərlik bir qrup və 11 həkim Türkiyəyə çatıb. Bununla da Rusiya xilasetmə qrupu 150 nəfərlik heyətlə Türkiyədə iş başındadır. Onlar Kahramanmaraşda səhra hospitalları qurublar. 40-dan çox tibb mütəxəssisi yaralılara xidmət göstərir. Bundan başqa İsgenderun bölgəsindəki yanğını söndürmək üçün Rusiyadan göndərilən Be-200 təyyarəsi yanğın üzərinə 60 tondan çox su tökərək alovun söndürülməsində birbaşa iştirak edib. 

Belarus və Ukrayna da Türkiyəyə xilasedici heyət göndərən ölkələr sırasındadır.

Hindistan Türkiyəyə 50 nəfərlik xilasedici heyət göndərib. Bununla yanaşı, xüsusi təlim görmüş itlər, deşici avadanlıqlar, dərman və digər vasitələr də Türkiyəyə çatdırılıb. Hindistanlı xilasedicilərin Adanada işlədiyi bildirilir. 

Qətər, İordaniya, Livan, Bəhreyn, Fələstin və Küveyt də Türkiyəyə xilasedici heyət və yardım vasitələri göndərən ölkələr sırasındadır. 

Birləşmiş Ərəb Əmirlikləri (BƏƏ) Türkiyəyə və Suriyaya ümumilikdə 100 milyon dollar ayırdığını açıqlayıb. Hökumət başçısı hər iki ölkəyə 50 milyon bəxş edəcəklərini bildirib. 

İraq Qızıl Aypara cəmiyyəti 55-60 maşınlıq bir karvanla toplam 150 nəfər xilasedicini Türkiyəyə göndərib. İraqlı xilasedicilər Qaziantepdə axtarış işlərinə cəlb olunublar.

C.Koreya xəbər agentliyi Yonhapın xəbərinə görə, ölkənin XİN Türkiyəyə 5 milyon dollarlıq humanitar yardım göndəriləcəyini bəyan edib. Bundan əlavə 110 nəfərlik personal axtarış-xilasetmə işlərinə cəlb olunub. 

Çin də Türkiyənin yardımına yetişən ölkələr sırasındadır. Hökumət Türkiyəyə 40 milyon yuan (təxminən 5.8 milyon dollar) dəyərində maddi yardım ediləcəyini bəyan edib. Bundan başqa “Ramuion” xilasetmə təşkilatının üzvləri xüsusi vasitələrlə “silahlanaraq” hadisə yerinə cəlb olunublar. 

ƏlCəzair də Türkiyəyə xilasetmə qrupu göndərib. Heyət xüsusi təlim görmüş itlərin də yer aldığı 86 nəfərdən ibarətdir. Onlar Adıyamandakı işlərə cəlb olunublar. 

Misir dövlət başçısı Abdulfəttah Sisi R.T.Ərdoğana zəng edərək başsağlığı verib. Sisi hökuməti Türkiyə və Suriyaya yardım məqsədi ilə 5 yardım təyyarəsi göndərib.

Tunis Daxili İşlər naziri Tofiq Şərafəddin Türkiyədə zəlzələdən zərərçəkənlərə yardım üçün 14 ton təcili yardım materialı göndərdiklərini açıqlayıb. Bundan başqa fəlakət bölgələrinə 41 nəfərlik axtarış-xilasetmə heyəti və 4 xüsusi təlim keçmiş it göndərilib.

Yaponiya da axtarış və xilasetmə işlərində təmsil olunur. Yaponiya Beynəlxalq Fövqəladə Xilasetmə Qrupundan 15 nəfər hadisə yerində iş başındadır.

Türkiyəyə xilasedici qruplar göndərən ölkələr sırasında Salvador və Venesuela da var. Yardım göndərən ölkələrin isə sayı artmaqda davam edir. Bu, bu günə qədər məlum olan ölkələrin siyahısıdır.