İqtisadiyyat.az-ın xəbərinə görə, Azərbaycan Dövlət Su Ehtiyatları Agentliyi (ADSEA) bununla bağlı hazırlıqlara start verib.
ADSEA-nın tabeliyindəki Tikilməkdə Olan Obyektlərin Müdiriyyəti kanalın yenidən qurulması işlərinin icrasını “Muğansutikinti” MMC-yə həvalə edib və onun müqavilə bağlayıb.
Müqaviləyə əsasən, Şirvan suvarma kanalının yenidən qurulması işləri çərçivəsində Yuxarı Şirvan kanalının yenidən qurulması (II mərhələ) işlərinin icrası 235.000.000 manata başa gələcək.
Xatırladaq ki, Prezident İlham Əliyev bu ilin aprelin 8-də “Şirvan suvarma kanalının yenidən qurulması haqqında” Sərəncam imzalayıb. Həmçinin Sərəncamla kanal Şirvan suvarma kanalı adlandırılıb.
Qeyd edək ki, ölkənin ikinci ən böyük kanalı olan torpaq məcralı Şirvan suvarma kanalı Şirvan düzündə yerləşən 8 rayonun 112 min hektardan artıq əkin sahəsini suvarma suyu ilə və yaşayış məntəqələrini məişət suyu ilə təmin edir. Fasiləsiz istismar olunduğu 65 ildən çox müddət ərzində sözügedən kanalın cari və əsaslı təmirinə baxmayaraq, onun torpaq məcrasında baş verən dəyişikliklər, eləcə də qurğuların öz funksiyasını itirməsi su itkisinin artmasına səbəb olub. Bununla əlaqədar kanalın yenidən qurulması üçün texniki-iqtisadi əsaslandırma və layihə-smeta sənədləri hazırlanıb.