Yunanıstan sahillərində miqrant qayığı qəzasında Yunanıstan sahil mühafizəsinin səhlənkarlığı ilə bağlı iddialar hər gün daha çox dilə gətirilir. Daha bir iddia isə qayığın həddindən artıq yüklənmiş olmasıdır ki, bu da batmasını sürətləndirən əsas amillərdəndir.
İqtisadiyyat.az dünya mediasına istinadən bildirir ki, Afina Vəkillər Kollegiyasının çağırışı ilə qəzanın səbəblərini araşdırmaq üçün 70-ə yaxın vəkildən ibarət qrup yaradılacaq.
Vəkillər Kollegiyasından verilən açıqlamada qəza şəraitinin hərtərəfli araşdırılması və həqiqətin üzə çıxarılması ilə günahkarların cəzalandırılmalı olduğu vurğulanıb:
"Həddindən artıq yüklənmiş qayıq vaxtında təsbit edilməli idi. Hadisəni izləyən təhlükəsizlik rəsmiləri və sərhəd mühafizə agentliyi Frontex heç bir xilasetmə tədbiri görməyib”.
Qeyd edək ki, Yunanıstan sahil mühafizəsi tərəfindən səhlənkarlıq iddiaları da irəli sürülüb.
Yunan mətbuatında yer alan xəbərə görə, fəlakətdən xilas olan bir immiqrant ifadəsində bildirib ki, ekipajı kəndirlə çəkməyə başlayanda qayıq batıb. Başqa bir mühacir isə ifadəsində Yunanıstan Sahil Mühafizəsinin qayığa kəndir bağladığını və qayığı həddindən artıq sürətlə o yan-bu yana yellədiyini və aşırdığını iddia edib.
