Məsələ ilə bağlı İqtisadiyyat.az-a açıqlama verən əmlak məsələləri üzrə ekspert Elnur Fərzəliyev bildirib ki, yeni tikilən çoxmənzilli binalarda idarəetmə ilə bağlı vahid dövlət qurumu yaradılmalıdır:
“Çünki bizdə mənzil istismar idarələri (“JEK”), mənzil mülkiyyətçilərinin müşrətək cəmiyyətləri (MMMC), “komendant” sistemi var və eyni zamanda bələdiyyələr də bir növ torpaqlarında olan əmlakların idarəetməsinə baxırlar. Bu qurumlar eyni işi görsələr də amma bunların fəaliyyəti qənaətbəxş deyil”.
Ekspertin sözlərinə görə, yeni tikili binalarda idarəetmə “komendant”lar və ya MMMC-lər tərəfindən aparılsa da, binalarda yığılan pullar təyinatı üzrə xərclənmir və yaxud da o pullardan düzgün istifadə olunmur:
“Binalarda ciddi şəkildə köhnəlmə prosesləri gedir ancaq yığılan vəsaitlər düzgün sərf olunmur. Binaların idarə edilməsi üçün büdcə formalaşmalıdır və gələcəkdə tələb olunan böyük xərclər həmin büdcə hesabına aparılmalıdır. Amma baxırıq ki, binaların lifti xarab olursa, yenə də sakinlərdən əlavə pul yığırlar, binanın fasadı və ya dam örtüyü təmir olunursa, yenə də sakinlərdən əlavə pul yığırlar. Ona görə də bütün bu problemlərin aradan qaldırılması ilə bağlı bir qurum yaranmalıdır”.
Ekspert bildirib ki, bütün idarəetmə bir qurum tərəfindən aparılsa, burada aylıq ödəmələr də minimala düşər:
“Misal olaraq, hər bir bina üçün ayrı təmizlik işçisi, ayrı mühafizə işçisi tutulması əvəzinə, vahid bir qurum olarsa, həmin işçi bir binaya deyil, bir neçə binaya baxacaq. Belə olan halda xərclər minimuma enəcək. Misal üçün biz “JEK”lərə ildə bir dəfə minimal məbləğ, təqribən 20 manat ödəyirik. Amma onlar bu pulla bütün ərazinin təmizlik işlərinə baxırlar. Ancaq çoxmənzilli yeni binalarda vətəndaşlar ayda 20 manatdan 200 manata qədər pul ödəyirlər, yenə də hansısa pul tələb olunanda vətəndaşdan yığılır. Bu problemin həll edilməsi üçün vahid qurum yaradılmalıdır”.
Elçin Mehdiyev
