Çində iki nəfərdə quş qripi virusu aşkarlanıb. İqtisadiyyat.az xarici mediaya istinadən xəbər verir ki, virusa yoluxmuş şəxslər ölkənin müxtəlif bölgələrində yaşayırlar. Çinin şərqində yaşayan 53 yaşlı qadının analizi müsbət çıxıb. Ölkənin qərbində yaşayan 49 yaşlı kişinin analizindən isə onun H5N6 virusuna yoluxduğu müəyyən edilib. Bu, H5N1 virusunun mutasiyaya uğramış variantı hesab olunur. Sözügedən şəxsin canlı quşlarla təmasa girdiyi məlum olub. Amma ölkədə bu il virusun insandan insana keçdiyi və ya sözügedən iki şəxsin daha öncə təmasa girdiklərinə dair heç bir sübut yoxdur. 

Bir neçə həftə əvvəl kambocalı bir qızın quş qripindən dünyasını dəyişməsi, atasının isə testinin pozitiv çıxması bölgədə narahatlığa səbəb olmuşdu. Elm adamları virusun asanlıqla mutasiyaya uğradığı üçün insanlara tez yoluxduğu qənaətindədir. Lakin həyatını itirən yeniyetmənin kimdənsə deyil, quş əti yedikdən sonra virusa yoluxduğu bildirilir. 

H5N6 virusunun 2020-ci ildə 2 minə yaxın quşun ölümünə səbəb olduğu məlumdur. İndi bunun insanlarda rast gəlinməsi hökuməti təhlükəsizlik tədbirlərini artırmaq istiqamətində hərəkətə keçirib. 

Mütəxəssislər həyəcan təbili çalır. İnsanlara xəstə və ya ölmüş quşlara toxunmamaq tövsiyə olunur. Çünki virus ölümcüldür və yoluxdurduğu insanların 56 %-nin həyatına son qoyduğu məlumdur.