Yaxın Şərq və Avropa dövlətləri Qəzza zolağı və İordan çayının qərb sahili üçün vahid Fələstin dövlətinin yaradılmasının tərəfdarıdır. 

İqtisadiyyat.az xəbər verir ki, bu barədə Ərəb Dövlətləri Liqası və İslam Əməkdaşlıq Təşkilatının nazirlər komitəsinin Ər-Riyadda bir sıra Avropa ölkələrinin nümayəndələrinin iştirakı ilə keçirilən iclasının yekunları üzrə verilən bəyanatda deyilir.

Səudiyyə Mətbuat Agentliyi tərəfindən dərc edilən sənəddə deyilir: "Görüş iştirakçıları Şərqi Qüds də daxil olmaqla, Qəzza zolağı və İordan çayının qərb sahili üçün vahid Fələstin dövlətinin yaradılmasına yönəlmiş səylərə dəstəyin artırılmasının vacibliyini vurğuladılar".

Bəyanat müəllifləri həmçinin iki dövlətli həllin həyata keçirilməsi üçün şəraitin yaradılmasına çağırıb və Fələstinin beynəlxalq hüququn müstəqil subyekti kimi tanınmasının vacibliyinə işarə ediblər. Bundan əlavə, görüş iştirakçıları Qəzza zolağında dərhal atəşkəsə nail olmaq, fələstinli əsirlərin və israilli girovların azad edilməsi, döyüşlər nəticəsində anklav sakinlərinin üzləşdiyi humanitar böhranın aradan qaldırılması istiqamətində səyləri dəstəkləyiblər.