Dünya neft ehtiyatlarının 48,3%-nə malik olan Yaxın Şərq ölkələri qlobal neft bazarında əvəzsiz mövqeyə malikdirlər.

İqtisadiyyat.az xəbər verir ki, bu barədə Londonda yerləşən "GlobalData" məlumatların təhlili və konsaltinq şirkəti məlumat yayıb.

Məlumata görə, Səudiyyə Ərəbistanı, İraq, Küveyt, İran, Oman və Birləşmiş Ərəb Əmirlikləri (BƏƏ) ötən il ən çox xam neft hasil edən ölkələr sırasında olublar. Qlobal neft bazarında kritik əhəmiyyətə malik olan Yaxın Şərqdəki 12 ən böyük neft yatağından isə gündəlik 15 milyon bareldən çox neft hasil edilir. Yaxın Şərqin neft ehtiyatları region ölkələrinin iqtisadi artımında çox mühüm yer tutur. Belə ki, bu ölkələr gəlirlərinin böyük hissəsini neftdən əldə edirlər.

Dünyanın ən böyük neft yatağı

Səudiyyə Ərəbistanının paytaxtı Ər-Riyadın 100 kilometr şərqində yerləşən "Qavar" neft yatağı həm ehtiyatlarına, həm də gündəlik hasilatına görə dünyanın ən böyük neft yatağıdır.

Ölkənin milli neft şirkəti olan “Saudi Aramco”ya məxsus yataqdakı ehtiyat 1948-ci ildə aşkar edilib və hasilata 1951-ci ildə başlanılıb. Ümumilikdə 96 milyard barel neft ehtiyatına malik olan "Qavar" yatağının gündəlik neft hasilatı 3,8 milyon bareldir.

 

Gözəl Həşimova