Xocalı faciəsinin 33-cü ildönümü ilə əlaqədar soyqırımı qurbanlarının xatirəsi yad edilir. Belə ki, bu gün səhər saatlarından başlayaraq insanlar Xocalı soyqırımı abidəsini ("Ana harayı" abidəsi) ziyarət edirlər.
Vətəndaşlar abidənin önünə tər qərənfillər düzərək faciə qurbanlarının xatirəsini dərin ehtiramla yad edirlər. Soyqırımı abidəsini ziyarət edənlər arasında adi vətəndaşlarla yanaşı, dövlət və hökumət rəsmiləri, ictimaiyyət nümayəndələri də var.
Qeyd edək ki, 1992-ci il fevralın 25-dən 26-na keçən gecə erməni silahlı dəstələri keçmiş sovet ordusunun Xankəndi şəhərində yerləşən 366-cı alayının iştirakı ilə Xocalı şəhərini yerlə-yeksan edib. Erməni təcavüzkarlarının Azərbaycan xalqına qarşı törətdiyi növbəti kütləvi qırğın nəticəsində 613 nəfər, o cümlədən 106 qadın, 63 uşaq, 70 qoca xüsusi amansızlıqla qətlə yetirilib, 1275 dinc sakin əsir götürülüb, 150 nəfərin taleyi isə hələ də məlum deyil. Bu soyqırımı aktı nəticəsində 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib.
İqtisadiyyat.az abidənin önündəki izdihamdan fotoreportajı təqdim edir:
