“Torpaq kanal 1 əsr əvvəlin texnologiyası hesab olunur. Ölkəmiz yeniliklərlə bağlı son 2-3 ildə aktiv siyasət aparır. 2020-ci ildə su komissiyası yaradıldı və tədbirlər planına uyğun olaraq 20-ə yaxın kanalın beton üzlüyə alınması məsələsi önə çəkildi. Lakin, nazirlik olaraq bizim baxış bucağımız belədir ki, beton örtük də bu günün texnologiyası deyil. Beton örtüyün özündə də itkilər var.

İqtisadiyyat.az xəbər verir ki, bu barədə ikinci Xəzər Su İnnovasiya Forumunda Kənd Təsərrüfatı Nazirliyinin Torpaq və sudan istifadəyə nəzarət şöbəsinin müdiri Firudin Tağıyev deyib.

O bildirib ki, əsas məsələ suyu itkisiz şəkildə sahəyə çatdırmaqla istifadə etməkdir. Bunun üçün isə idarə olunan su sistemləri tətbiq olunmalıdır:

“Bir sözlə biz sahələri də qapalı su sistemləri ilə təchiz etməliyik. Ona görə də mütləq qapalı su sistemlərinə keçmək lazımdır. Məlumdur ki, bu sistem olduqca xərc tələb edir, biz komissiyada müəyyən hesablamalar aparmışıq. Bir daha deyirəm əgər su qapalaı şəbəkələrlə sahəyə çatdırılarsa, biz itkiləri aradan qaldırmış olarıq”.

Bildirək ki, hazırda forumda su texnologiyaları və kimya həlləri sahəsində dünyanın aparıcı şirkətlərindən olan “AO Smith”, “Nijhuis Saur İndustries”, “Unidro”, “PWNT”, “ARC Water Technologies", “Jumo” şirkətlərinin baş sponsorluğu “Ultraaqua”, “Sirab” və “Azərsu” ASC-nin sponsorluğu ilə təşkil ediləcək Forumda Amerika Birləşmiş Ştatları, Almaniya, İtaliya, Fransa, Niderland, Danimarka, Belçika krallıqlarının, Türkiyə, Ukraina, İzrail, Yaponiya və s. ölkələrinin aparıcı və tanınmış şirkətləri öz təcrübələrini yerli sahibkarlarımızla paylaşırlar.

Forumun media tərəfdaşlarından biri də İqtisadiyyat.az saytıdır.