Ermənistan Avropa İttifaqı (Aİ) ilə yeni əməkdaşlıq sənədi hazırlayır. 

İqtisadiyyat.az xəbər verir ki, bunu martın 15-də Milli Assambleyada Avropaya inteqrasiya məsələləri daimi komissiyasının iclasında hökumətin 2023-cü il üçün (2021-2026-cı illər) proqramının icrası prosesi və yekunlarına dair hesabatın müzakirəsi zamanı xarici işlər nazirinin müavini Paruyr Hovhannisyan deyib.

Onun sözlərinə görə, bu sənədin imzalanması bu ilin iyul ayına planlaşdırılır.

"Ermənistan-Avropa İttifaqı Hərtərəfli və Genişləndirilmiş Tərəfdaşlıq Sazişinin tam yerinə yetirildiyi təqdirdə, biz həqiqətən də Aİ üzvlüyünə namizəd ölkə statusuna malik olacağıq", - nazir müavini bildirib.

Buna paralel olaraq, Hovhannisyanın qeyd edib ki, ötən ilin noyabrında baş tutan faktaraşdırıcı missiyanın nəticəsi olaraq ortaya çıxan yeni əməkdaşlıq istiqamətləri və yeni proqramlar hazırlanır.

"İndi bu iki proses və siyasi yaxınlaşmamızın ifadəsi ilə yanaşı, yeni sənəd hazırlanır. Bununla bağlı bəzi məsələlər artıq Ermənistan-Aİ Tərəfdaşlıq Şurasında və digər səviyyələrdə müzakirə olunub. Biz may ayında yeni layihənin qəbulunu gözləyirik, yəqin ki, iyulda qəbul olunacaq", - XİN nümayəndəsi bildirib.