İqtisadiyyat.az xəbər verir ki, bunu Prezident yanında Antiinhisar və İstehlak Bazarına Nəzarət Dövlət Agentliyinin İstehlakçı hüquqlarının müdafiəsi şöbəsinin müdiri Elşən Cəfərov deyib. 

Onun sözlərinə görə, istehlakçılar xaricdən sifarişlər zamanı çatdırılma haqqının göstərilən və ya endirimli qiymətdən fərqli qiymətə hesablanması, bağlamanın çəkisinin düzgün hesablanmaması və buna uyğun olaraq xidmət haqqının düzgün hesablanmaması, çatdırılma tarifinin xarici valyutada göstərilməsi, reklam qanunvericiliyinin pozulması, saytda və ya tətbiqdə xidmət haqqında məlumatın (çatdırılma şərtləri və müddəti, xidmətin qiyməti və s.) göstərilməməsi, qanunvericilikdə nəzərdə tutulan hüquqlarla müqayisədə istehlakçının hüquqlarını məhdudlaşdıran şərtlərin müqaviləyə daxil edilməsi halları ilə qarşılaşdıqda Dövlət Agentliyinə müraciət edə bilərlər. 

Şöbə müdiri bildirib ki, ödənişin nağdsız qaydada qəbulundan imtina olunması, ödəniş sənədlərinin təqdim edilməməsi ilə bağlı məsələlərə baxılması isə Dövlət Vergi Xidmətinin səlahiyyətindədir.

Bundan əlavə, istehlakçılar malın qüsurlu olması və ya daşınma zamanı zədələnməsi, həmçinin bağlamanın açılması, itirilməsi, yanlış ünvana və ya şəxsə çatdırılması və s. bu kimi hallarla rastlaşa bilərlər. Bu və digər məsələlərlə bağlı  istehlakçılar İnformasiya və Kommunikasiya Texnologiyaları Agentliyinə müraciət edə bilərlər.