Son dövrlər ali təhsil almaq üçün xaricə üz tutan şəxslərin sayında artım müşahidə olunur. Həmin şəxslər ya müxtəlif təhsil proqramları vasitəsilə, ya da attestatla xaricdə təhsilini davam etdirirlər. Lakin təhsilini başa vuran məzunlar bir sıra çətinliklərlə qarşılaşır. Belə ki, ali təhsilini başa vuran bəzi gənclər diplomlarını Azərbaycanda tanıtmaları üçün problemlərlə üzləşirlər. Bəs görəsən bu çətinliklərlə qarşılaşmamaq üçün hansı addımlar atılmalıdır? Xaricdə təhsil almaq istəyən şəxslər hansı prosedurları bilməli, hansı vacib nüanslara diqqət yetirməlidir?

Təhsildə Keyfiyyət Təminatı Agenliyindən İqtisadiyyat.az-ın sorğusuna cavab olaraq bildirilib ki, ötən il diplomun tanınması ilə bağlı mənfi cavab verilən müraciətlərin sayı 1132 olub.

Qeyd edilib ki, ötən il - yanvarda 95, fevralda 21, martda 58, apreldə 62, mayda 55, iyunda 71, iyulda 183, avqust və sentyabr aylarında 233, oktyabrda 125, noyabrda 160, dekabr ayında isə 69 nəfərin diplomun tanınması ilə bağlı müraciətinə mənfi cavab verilib.

Təhsil məsələləri üzrə eskpert Elmin Nuri isə İqtisadiyyat.az-a söyləyib ki, xaricdə təhsil almaq hər kəsin hüququdur: “İstər yüksək intellektual bilik tələb edən beynəlxalq proqramlar - “TOEFL, İELTS, SAT kimi proqramlarla, istər o qədər də geniş və böyük imtahan göstəricisi tələb etməyən və əsasən, qonşu dövlətlərlə məhdudlaşan imtahan prosesləri vasitəsilə, istərsə də ümumiyyətlə imtahan vermədən, attestat göstəriciləri ilə xaricə üz tutan hər bir kəsin xaricdə təhsil almaq hüququ var və biz buna müdaxilə edə bilmərik”.

Ekspertin sözlərinə görə, xaricdə ali təhsil almaq istəyən şəxslər ciddi araşdırma etməli və bu istiqamətdə prosedur qaydalarının yaxşı bilməlidir: “Hər hansı bir valideyn öz məsrəfləri hesabına övladının xaricdə oxumağını istəyirsə, o, əvvəlcə Təhsildə Keyfiyyət Təminatı Agentliyinin rəsmi saytında müəyyən prosedur və təkliflərlə, ümumiyyətlə xaricdə təhsillə bağlı faydalı tövsiyələr paketi ilə maraqlanmalıdır. Diplomun tanınması ilə əlaqədar sonradan hər hansı bir problemlə qarşılaşmamaq üçün diplomları Azərbaycanda tanınan xarici universitetlərin siyahısı ilə ciddi maraqlanmalı, həmin siyahı əsasında hərəkət etməlidirlər. Xaricdə təhsil zamanı yerinə yetirilməli olan vacib prosedurları dərindən bilməli və həmin prosedurlara görə addım atmalıdırlar”.

Mütəxəssis vurğulayıb ki, bəzən xaricdə təhsil almaq istəyən şəxslərin ciddi və hüquqi şəkildə işini qurmuş xaricdə təhsil şirkətləri ilə konsultasiya etmək əvəzinə bəzi özünü doğrultmamış şirkətlərə müraciət etdikləri ilə bağlı məlumatlara rast gəlinir: “Univerisitetə daxil olduqdan sonra da hüquqi prosedurlara o qədər də məhəl qoymurlar. Hüquqi prosedurların tam həll olunmaması səbəbindən çox təəssüf ki, müəyyən çətinliklərlə üzləşməli olurlar. Hamımız təhsilli bir cəmiyyətdə yaşayırıq. Elə bir bölgə yoxdur ki, orada savadsızlıq problemi, informasiya texnologiyaları ilə təmas mümkünsüz olsun. Bu detalların sayəsində istənilən rəsmi yaxud qeyri-rəsmi məlumata çata bilərik. Bütün bu prosedurlar əvvəlcədən bir-bir yoxlanılmalıdır. Əks halda bir yenə də mənfi hallarla rastlaşa biləcəyik”.

 

İsmayıl Bakuvi