"COP29-un Azərbaycanda keçirilməsi ilə bağlı qərarın qəbul edilməsi ölkəmizin bu sahədəki fəaliyyəti BMT daxil olmaqla, beynəlxalq və qlobal təşkilatlar tərəfindən yüksək qiymətləndirildiyini bir daha sübut edir".
Bu sözləri İqtisadiyyat.az-a açıqlamasında Milli Məclisin deputatı Vüqar Bayramov deyib.
O vurğulayıb ki, Azərbaycan regionda yaşıl enerjinin inkişafına ən çox investisiya edən ölkələrdən biridir: "Son illər bu sahəyə yönəlmiş sərmayələrin həcmi 1 milyard dollardan artıqdır. COP29 bir sıra istiqamətlərdə, Azərbaycanın iqtisadiyyatı, eyni zamanda, Azərbaycanın yaşıl enerji sahəsində həyata keçirdiyi fəaliyyətlərin təqdimatı baxımından da çox vacibdir. Azərbaycan yaşıl enerji sahəsində bir sıra aparıcı şirkətlərlə və beynəlxalq qurumlarla əməkdaşlıq edir. Eyni zamanda ölkəmizin yaşıl enerjinin istehlakda payı ilə bağlı bəlli hədəfləri var. Bu hədəflərin reallaşması istiqamətində intensiv addımlar atılır".
COP29 tədbirinin ölkəmizə gətirəcəyi dividendlər barədə danışan deputat diqqətə çatdırıb ki, bu konfrans turizm və xidmət sektorunun gəlirliyini artırmaqla yanaşı həm də sərmayələrin cəlb edilməsi baxımından vacibdir:
"Çünki bu, praktik olaraq, həm Azərbaycan iqtisadiyyatının potensialını təqdim etmək imkanı verəcək, həm də ölkəmiz üçün birmənalı şəkildə yeni sərmayələr, xüsusilə də, xarici sərmayələrin cəlbi baxımından səmərəli olacaq. Cənab Prezident yeni dövrün yeni hədəflərini müəyyənləşdirən zaman xarici sərmayələrin cəlb edilməsini əsas istiqamətlərdən biri kimi qeyd etmişdi. Xüsusilə də, qeyri-neft sektoruna xarici sərmayələrin cəlb edilməsi vacibdir. COP Azərbaycan üçün iqtisadi üstünlüklər və dividendlər gətirəcək".
İsmayıl Bakuvi
