"Qısa zaman ərzində Vəkillər Kollegiyasında müasir tələblərə cavab verən veb səhifə yaradılmışdır. Bütün vəkillərin onlyan reyestri yaradılıb və həmin reyestr mütəmadi olaraq yenilənir".

İqtisadiyyat.az xəbər verir ki, bunu Vəkillər Kollegiyasının sədri Anar Bağırov "Elektron vəkil orderi" və digər elektron xidmətlərin ictimaiyyətə təqdimatı zamanı deyib.

O qeyd edib ki, bugünkü tədbir çox önəmli bir məsələyə həsr olunub: "Belə ki, insanlara çox önəmli olan keyfiyyətli hüquqi yardım göstərən və beləliklə, dövlətin üzərinə götürdüyü öhdəliklərin birbaşa icrasında iştirak edən vəkillik üçün elektron xidmətlər rəqəmsallaşma və müasir informasiya kommunikasiya texnologiyalarından istifadə hazırda ən prioritet məsələlərdən biridir. Vəkillər Kollegiyası olaraq biz son illər ərzində vəkillikdə bütün müasir tələblərə cavab verən bir fəaliyyət qurmaq istiqamətində addımlar atırıq. Zənnimcə, burada 22 fevral 2018-ci il tarixli vəkilliyin inkişafı ilə bağlı əlavə tədbirlər barədə Cənab Prezidentin sərəncamına xüsusilə toxunulmalıdır. Məhz həmin sərəncam qəbul olunduqdan sonra vəkillikdə elektronlaşdırılma, rəqəmsallaşma prosesi başlamışdır. Məlum olduğu kimi Cənab Prezidentin sərəncamında vəkillikdə elektron xidmətlərin göstərilməsi, vəkilliyin elektron vəkillik sisteminə inteqrasiyası məsələsi Vəkillər Kollegiyasına tövsiyə edilmişdir. Bizim üçün bu tövsiyə eyni zamanda çox önəmli rol oynamışdır. Qısa zaman ərzində Vəkillər Kollegiyasında müasir tələblərə cavab verən veb səhifə yaradılmışdır. Bütün vəkillərin onlyan reyestri yaradılıb və həmin reyestr mütəmadi olaraq yenilənir".

Sədr söyləyib ki, beləliklə illər boyu insanların vəkil seçmək, vəkil tapmaq kimi problemləri birdəfəlik olaraq keçmişdə qalıb:."Eyni zamanda hər bir vəkil üçün elektron vəkil kabineti yaradılıb. Həmin elektron vəkil kabineti vasitəsilə bu gün Azərbaycan vəkili rahatlıqla elektron məhkəmə sistemindən istifadə edə bilir. Həmçinin Vəkillər Kollegiyası arasında olan kommunikasiyalar, yazışmalar, sənəd dövriyyəsi də məhz elektron qaydada bu kabinet vasitəsilə həyata keçirilir. Qısa zaman ərzində Vəkillər Kollegiyasının daxili fəaliyyəti də tam elektronlaşdırılıb. Hazırda vəkillərin şəxsi işlərinin hamısı elektron qaydadadır. Bütün kargüzarlıq elektron qaydaya keçirilir. Hesab edirəm ki, bu proses indən belə də davam etməlidir. Çünki elektronlaşdırılma və rəqəmsallaşma bir gün ərzində həll olunan bir problem deyil".

Sadiq Cavadov