"Mafiya qaydaları ilə idarə olunan rejimlərdə bu cür səhvlər bağışlanmır".
Bu sözləri "Vaqner"in gələcək fəaliyyəti ilə bağlı gözləntilərə toxunan politoloq Şahin Cəfərli İqtisadiyyat.az-a açıqlamasında deyib.
Onun sözlərinə görə, "Vaqner"in Rusiya hakimiyyətinə qarşı vuruşacağı gözlənilən deyil:
""Vaqner" hərbi şirkətinin rəhbəri Yevgeni Priqojinə məxsus özəl təyyarənin yerdən raketlə vurulduğu artıq şübhə doğurmur. Bu cür əməliyyat məhz Putinin icazəsi ilə həyata keçirilib. Əslində 2 ay öncə Priqojin həyatının səhvini etdi. Onun Rusiya hökumətinə qarşı silahlı üsyana başlaması və Belarus prezidenti Aleksandr Lukaşenkonun müdaxiləsindən sonra dayanması qeyri-rasional davranış oldu. Priqojin Putin rejimini çox yaxşı tanıdığı halda atdığı addım müəmmalı idi. Çünki mafiya qaydaları ilə idarə olunan rejimlərdə bu cür səhvlər bağışlanmır və nəticəsi çox pis olur. Bu cür rejimlərdə "İnsan yoxdur, problem yoxdur" devizi ilə hərəkət edilir.
Bundan sonra sağ qalan vaqnerçilərin atacağı addım sual altındadır. Çünki "Vaqner" başsız qaldı. Ölənlər arasında Priqojinin müavini Dmitriy Utkinin də olması bu strukturun planlı şəkildə hərəkət edəcəyinə inamı azaldır. Nəzərə almaq lazımdır ki, vaqnerçilər Belarusa gedəndən sonra onların sərəncamında olan hərbi texnika Rusiya Müdafiə Nazirliyinə təhvil verildi. Bu da kritik xətalardan biridir".
Qeyd edək ki, "Vaqner" hərbi şirkətinin rəhbəri Yevgeni Priqojinə məxsus özəl təyyarə Tver vilayətində qəzaya uğrayıb. Qəza nəticəsində "Vaqner"in rəhbəri Yevgeni Priqojin, onun müavini Dmitriy Utkin və digər 8 nəfər həyatını itirib. "Vaqner"ə yaxın bəzi "Telegram" kanallarında təyyarənin Rusiyaya aid müdafiə sistemləri tərəfindən vurulduğu iddia olunub.
Gülşən Şərif
