"Ukrayna 700 km məsafədə hədəfi vura bilən raketlər istehsal etməyi öyrənib". 

İqtisadiyyat.az xəbər verir ki, bu açıqlama ilə Ukraynanın strateji sənaye naziri Aleksandr Kamışin çıxış edib.

"Bizim üçün ən vacib proqram raket proqramıdır. Bu barədə prezidentimin dediyi kimi deyəcəyəm: bizim 700 km məsafədə hədəfi vuran uzaqmənzilli silahlarımız var", - Kamışin deyib. 

Qeyd edək ki, Rusiya xüsusi hərbi əməliyyata başlayandan bəri Qərb ölkələri Ukraynaya silah tədarükünü dəfələrlə artırıb. Eyni zamanda, Kiyev öz tərəfdaşlarından daim daha müasir modellər, Amerika qırıcıları və uzaqmənzilli raketlər istəyir. Bəzi ekspertlər hesab edir ki, Qərb liderləri Kiyevin uzaqmənzilli raketlərlə bağlı müraciətlərindən ehtiyatlanır, çünki onlar bu raketlərdən Ukraynanın Rusiya ərazisinə zərbələr endirmək üçün istifadə olunmasını istəmirlər. Öz növbəsində Ukrayna prezidenti Volodimir Zelenski bildirib ki, Kiyev Rusiya ərazisinə zərbələr endirmək üçün Qərb silahlarından istifadə etməyəcək, lakin bunun üçün öz silahlarından istifadə edə bilər.