"Ukrayna Krımı hərbi yolla geri qaytaracaq, çünki hələlik başqa variant yoxdur".

İqtisadiyyat.az Ukrayna mediasına istinadən xəbər verir ki, bunu Ukraynanın Milli Təhlükəsizlik və Müdafiə Şurasının katibi Aleksey Danilov dilə gətirib.

Onun sözlərinə görə, hərbi yoldan başqa variantları yoxdur: "Əgər işğalçı ölkə bizim ərazimizi tərk etməli olduğunu başa düşməsə, bizim başqa çarəmiz qalmır. Hərbi yolla da olsa Krımı azad edəcəyik", - deyə Milli Təhlükəsizlik və Müdafiə Şurasının katibi bildirib.

Danilov onu da vurğulayıb ki, Krım qaytarılmayana qədər münaqişə bitmiş hesab edilə bilməz: "Çünki bu, müharibənin gələcək nəsillərə ötürülməsi və onların bu təhlükə ilə yaşamağa məcbur olması deməkdir. Yalnız Rusiyanı Krım ərazisindən çıxarmaqla və Azov dənizinə sıxışdırmaqla dövlətimizin müəyyən müddət ərzində təhlükəsizliyini təmin etmiş olacağıq". 

Danilovun sözlərinə görə, Qərbdən onlara Krımı hərbi yolla geri almamaqla bağlı çağırışlar gəlir, lakin onlar geri addım atmayacaqlar: "Bu əlbəttə ki, çətin olacaq. Elə ona görə də bizi müəyyən güzəştlərə razı salmağa çalışırlar. Amma biz öz işimizi görməliyik, ərazilərimizi azad etməliyik, Qara və Azov dənizlərinə qayıtmalıyıq. Krımda öz donanmamız olmasa, təhlükəsizlik baxımından son dərəcə çətin vəziyyətə düşəcəyik”, - deyə Danilov fikrini yekunlaşdırıb.