İqtisadiyyat.az xəbər verir ki, bu barədə ABŞ prezidentinin Yaxın Şərq üzrə xüsusi nümayəndəsi Stiv Uitkoff RİA Novosti-yə açıqlamasında bildirib.

"Danışıqlar pozitiv, konstruktiv və işgüzar şəraitdə keçdi. Bütün iştirakçılar lazımi nəticəyə nail olmaq üçün səylə çalışdılar. Görüşdən sonra yekunları müzakirə edərkən anladıq ki, bundan daha yaxşı nəticə təsəvvür edə bilməzdik", - deyə Uitkoff vurğulayıb.

Qeyd edək ki, Səudiyyə Ərəbistanında keçirilən görüşdə Rusiya və ABŞ nümayəndə heyətləri Rusiya prezidenti Vladimir Putin və ABŞ prezidenti Donald Tramp arasında görüşün təşkili üçün hazırlıqları davam etdirməyə hazır olduqlarını bildiriblər.

Fevralın 18-də Ər-Riyadda Rusiya və ABŞ nümayəndələri arasında keçirilən danışıqlar başa çatıb. 4,5 saat davam edən görüşdə Ukrayna münaqişəsinin həlli üçün təmasların qurulması məsələsi də müzakirə olunub.

Görüş zamanı ABŞ dövlət katibi Marko Rubio və Rusiya xarici işlər naziri Sergey Lavrov Ukrayna ilə bağlı danışıqlar aparmaq üçün xüsusi işçi qruplarının yaradılmasına dair razılığa gəliblər. Bununla belə, Rusiya prezidentinin köməkçisi Yuri Uşakov bildirib ki, Putin və Trampın görüşü barədə danışmaq hələ tezdir.