Türkiyədə baş tutan prezident və parlement seçkilərindən sonra Türkiyə milli valyutasının vəziyyəti yenidən gündəmə gəlib. Son valyuta göstəricilərinə görə, Türkiyədə bir dollar 20.71 türk lirəsi dəyərindədir. Bəzi ekspertlər seçkilərdən sonra lirənin dəyər itirə biləcəyini proqnozlaşdırır. Mövzu ilə bağlı İqtisadiyyat.az-ın suallarını cavablandıran iqtisadçı Xalid Kərimli beynəlxalq proqnozlara istinad edərək vəziyyətin optimist olmadığı qənaətindədir: “Seçkilərdə AKP inamlı qələbə qazandı və bazarlar da hesab etdi ki, hökumət son 3-4 ildə apardığı siyasəti davam etdirəcək. Buna görə də lirəni satmağa başladılar. Bu da lirənin dəyərini aşağı saldı. Müxtəlif beynəlxalq təşkilatlar və investisiya bankları var ki, onların proqnozları təxminən oxşardır. Əksəriyyəti lirənin ilin sonuna qədər dəyər itirəcəyini proqnozlaşdırır. Ümumiləşdirsək investisiya banklarının fikrincə, türk lirəsinin dəyərdən düşməsi növbəti aylarda da davam edəcək. Hətta ən konservativ proqnozlara görə, lirənin indiki səviyyəsindən 10-15 % dəyər itirəcəyi gözlənilir”.

İqtisadçı-ekspert vəziyyətin bu həddə gəlib çıxmasının səbəblərindən də söz açıb: “Məsələ ondan ibarətdir ki, indiki AKP hökumətinin pul və faiz siyasəti ənənəvi siyasətdən fərqlənir. Ənənəvi siyasət nədir? Dünya iqtisad elmində qəbul edilmiş reallıq ondan ibarətdir ki, əgər inflyasiya sürətlidirsə, siz faiz dərəcələrini artırıb pulu azaltmalısınız. Ki, inflyasiya aşağı düşsün. Amma hazırki hökumət biraz fərqli siyasət yeridirdi. Onlar hesab edirdilər ki, inflyasiyanın səbəbi faiz dərəcələrinin yüksək olmasıdır. Onların fikrincə, “faiz dərəcələri xərci artırır, bu da inflyasiyaya gətirib çıxarır”, “biz faiz dərəcələrini aşağı salmaqla inflyasiyaya nəzarət edəcəyik”, “əsas məqsədimiz də məşğulluq və ixracatdır”. Bu da pulu dəyərdən salan, inflyasiyanı daha da artıran amildir.