İstanbulda İsrail əleyhdarı olan bir qrup vətəndaş polislə toqquşub, 43 nəfər nəzarətə alınıb. 

İqtisadiyyat.az xəbər verir ki, bu barədə Türkiyə Daxili İşlər Nazirliyinin rəhbəri Ali Yerlikaya məlumat verib.

Nazirin sözlərinə görə, insident İsrailin Qəzza zolağındakı hərəkətlərinə etiraz aksiyasının keçirildiyi Beyoğlu rayonunda baş verib.

"Bu gün Beyoğluda fələstinli qardaşlarımızı sıxışdıran və soyqırım həddinə çatan kütləvi qətllər törədən İsrailə qarşı etiraz aksiyası keçirilib. Aksiya sonunda nümayişçilər dağılışıb, lakin bütün bunlara baxmayaraq, bir qrup insan etiraz yerində qalıb. Onlar təhlükəsizlik qüvvələrinə müqavimət göstərib və hökumət nümayəndələrini təhqir ediblər. Bu hadisə ilə bağlı 43 nəfər saxlanılıb", - nazir bildirib.

Yerlikaya əlavə edib ki, saxlanılanların sənədləri yoxlanıldıqdan sonra onlardan 38-i sərbəst buraxılıb, 5 nəfər haqqında isə məhkəmə prosesi başlayıb. Bundan əlavə, bu hadisədən sonra iki polis əməkdaşı vəzifəsindən uzaqlaşdırılıb. Onlarla bağlı araşdırma aparılır. Nazir hüquq-mühafizə orqanları əməkdaşlarının işdən çıxarılmasının səbəblərini açıqlamayıb.