"Türkiyədə süni intellektlə çalışan çoxsəviyyəli "Dəmir Günbəz hava hücumundan müdafiə sistemi yaradılacaq".
İqtisadiyyat.az xəbər verir ki, bu məsələ Prezident Rəcəb Tayyib Ərdoğanın sədrliyi ilə Ankarada keçirilən Müdafiə Sənayesi İcraiyyə Komitəsinin iclasında müzakirə edilib.
"Dəmir günbəz" layihəsi hava hücumundan müdafiə sistemlərinin vahid şəbəkəyə inteqrasiyasını və onun vasitəsilə real vaxt rejimində qərar qəbul etmək üçün məlumatların ötürülməsini nəzərdə tutur.
Həmçinin, Silahlı Qüvvələr üçün milli qırıcı KAAN, Bayraktar TB3, Akıncı və Aksunqur PUA-ları, kamikadze və mini pilotsuz təyyarələr, elektron döyüş sistemləri, müxtəlif dərəcəli PUA-lardan qorunma layihələri nəzərdən keçirilib. Bundan başqa, zirehli texnikanın, Türkiyə Ordusunda xidmətdə olan döyüş təyyarələrinin daxili imkanlar nəzərə alınmaqla modernləşdirilməsi, komanda, idarəetmə və rabitə sistemlərinin satın alınması layihələri nəzərdən keçirilib.
