"Dynamic Express"ə yanğın təhlükəsizliyi qaydalarının pozulması və ya yerinə yetirilməməsi ilə bağlı qanunvericiliyin tələblərini pozduğu üçün cərimə yazılıb.

İqtisadiyyat.az xəbər verir ki, şirkət barəsində Fövqəladə Hallar Nazirliyi tərəfindən İnzibati Xətalar Məcəlləsinin 518.1-ci maddəsinə əsasən cərimə protokolu tərtib edilib.

Daha sonra protokol baxılması üçün Xətai Rayon Məhkəməsinə göndərilib.

İş hakim Fuad Axundovun sədrliyi ilə araşdırılacaq.

Şirkətin barəsində cərimə protokolu yazılmasına səbəb olan maddədə isə deyilir ki, mülkiyyət formasından asılı olmayaraq müəssisə, idarə və təşkilatlarda, ictimai yerlərdə, anbarlarda, yataqxanalarda və ya digər yaşayış sahələrində, meşələrdə və nəqliyyatda yanğın təhlükəsizliyi standartlarının, normalarının və qaydalarının tələblərinin pozulmasına və ya yerinə yetirilməməsinə görə fiziki şəxslərə xəbərdarlıq edilir və ya onlar iyirmi manatdan otuz manatadək məbləğdə cərimə edilir, vəzifəli şəxslərə xəbərdarlıq edilir və ya onlar yüz manatdan yüz əlli manatadək məbləğdə, hüquqi şəxslər üç yüz əlli manatdan beş yüz manatadək məbləğdə cərimə edilir.

Qeyd edək ki, "Dynamex" kuryer şirkəti 2018-ci ildən etibarən fəaliyyət göstərən sürətli poçt şirkətidir. Şirkət Türkiyədən şəxsi və korporativ yüklərin daşınmasını həyata keçirir.