İqtisadiyyat.az xəbər verir ki, bu barədə "Bloomberg" məlumat yayıb.
“Trampın məsləhətçiləri qarşıdakı aylarda Rusiya ilə Ukrayna arasında diplomatik razılaşmanı dəstəkləməyə yönəlmiş kompleks strategiya hazırlayır”, – deyə agentlik mənbələrə istinadən bildirir.
Strategiya mümkün razılaşmanın mərhələlərindən asılı olan iki variantı əhatə edir. Əgər ABŞ razılaşmanın yaxınlaşdığına əmin olarsa, variantlardan biri sanksiyaların yumşaldılmasını və ya “xoş niyyət addımları”nın atılmasını nəzərdə tutur ki, bu da Rusiya neft şirkətlərinə kömək edə bilər. İkinci halda isə sanksiyalar gücləndirilərək Rusiyaya təzyiq artırıla bilər.
Mümkün yumşalma addımlarından biri kimi, Rusiya neftinə tətbiq edilən qiymət tavanının 60 dollardan yuxarı qaldırılması göstərilir.
Sərtləşdirilmə halında, Rusiyadan neft daşıdığı iddia edilən gəmilərə qarşı ikinci dərəcəli sanksiyaların və ya məhdudiyyətlərin tətbiqi variantları da nəzərdən keçirilir.
Bundan əvvəl Tramp bildirmişdi ki, Rusiya prezidenti Vladimir Putinlə Ukrayna məsələsi üzrə danışıqlar bir neçə ay ərzində baş tuta bilər.
Tramp dəfələrlə Ukraynadakı münaqişənin bir gün ərzində həll edilə biləcəyini iddia edib, lakin Rusiyada bunun bu qədər qısa zamanda həll edilə bilməyəcək qədər mürəkkəb bir problem olduğunu hesab edirlər.