Xəbər verdiyimiz kimi, Nazirlər Kabinetinin yeni qərarı ilə bəzi tikinti materialları 5 faiz idxal gömrük rüsumundan azad olunub. Bəs bu qərar ölkədə tikinti bazarındakı qiymətlərə necə təsir göstərəcək?

İqtisadiyyat.az bununla bağlı iqtisadçı Natiq Cəfərlinin fikirlərini öyrənib. O bildirib ki, rüsum azaldığı zaman bu, qiymətlərə də təsir göstərir. Sadəcə 5%-in qiymətlərdə köklü dəyişikliyə səbəb olacağını söyləmək mümkün deyil:

“Amma ən azından qiymət artımının qarşısını ala biləcək, yaxud azalda biləcək faktora çevrilə bilər. İstənilən məhsulun bölgəyə gətirilməsi üçün nə qədər çox vergi, nə qədər çox vergi ödənilirsə, bu onun qiymətində öz əksini tapır”. 

Natiq Cəfərli həmçinin qeyd edib ki, bu qərarın verilməsinə səbəb, Azərbaycanın işğaldan azad olunan torpaqlarında çox böyük təmir-tikinti işlərinin getməsi və inşaaat materiallarına təlabatın artmasıdır:

“Yəqin ki, bu nəzərə alınaraq belə bir qərar verilib. Lakin bunun tikinti bazarında qiymətlərə kəskin təsir edəcəyini söyləmək doğru deyil”.

Xatırladaq ki, bəzi tikinti materiallarının 5 faiz idxal gömrük rüsumundan azad olunması Nazirlər Kabinetinin qərarı ilə Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri"ndə edilən dəyişiklikdə əksini tapıb.

Qərara əsasən, tərkibində MgO, CaO və ya Cr2O3-ə hesablanmış 50 kütlə %-dən çox bir yerdə və ya ayrı-ayrılıqda götürülmüş Mg, Ca və ya Cr elementləri olan, tərkibində 93 kütlə % və ya daha çox silisium oksid (SiO2) olan, tərkibində 7 kütlə %-dən çox, lakin 45 kütlə %-dən az olan giltorpaq (Al2O3) olan tikinti materialları gələn il yanvarın 1-dən 31 dekabr 2030-cu ilədək 5 faiz gömrük rüsumundan azad olunur.