Azərbaycanda bəzi tikinti materiallarının bahalaşacağı proqnozlaşdırılır. Ekspertlər bahalaşmaya gətirib çıxaracaq səbəbləri bir sıra amillərlə şərh edirlər. 

Əmlak məsələləri üzrə eskpert Ramil Qasımzadə İqtisadiyyat.az-a deyib ki, tikinti materialları bazarında ötənilki bahalaşmadan sonra bir qayda olaraq qış aylarında stabillik hökm sürür.

Onun sözlərinə görə, hər hansı xarici faktor təsir göstərmirsə, daha çox qış mövsümündə bahalaşma müşahidə edilmir. Amma mart ayından etibarən üzü yaza doğru qiymətlərdə dəyişiklik müşahidə olunmağa başlayır.

Ekspert bildirib ki, həm əmək qanunvericiliyində sosial dəyişikliklər, həm də kommunal xidmətlərin qiymətlərində olan dəyişikliklər tikinti materiallarının, xüsusilə, bu sahədə yerli istehsalın qiymətinə təsirsiz ötüşməyəcək:

“Lakin bu amillər dərhal bazara təsir göstərmir. Çünki bazarda ötən ildən qalma məhsullar var və hazırda onların realizasiyası gedir. Yəqin ki, bu dəyişikliyi biz mart ayının əvvəlindən müşahidə edə biləcəyik. Yaz aylarında tikinti materiallarına həm tələbatın artması, həm də qanunvericilikdə olan dəyişikliklər, xüsusilə, yerli məhsulların qiymətlərinə təsir göstərəcək. Xaricdən idxal olunan mallarda da gələcəkdə bizdən asılı olmayan həm idxalla bağlı, həm də xarici şirkətlərdə baş verən dəyişiklər də əsas təsir göstərən amillərdəndir. Məsələn, Rusiya Federasiyası taxta idxalı ilə bağlı bəzən qadağalar tətbiq edir. Yaxud da qiymətlər də digər səbəblərdən həm aşağı, həm də yuxarı ola bilir”.

İqtisadçı Xalid Kərimli isə söyləyib ki, tikinti materiallarının qiyməti 2025-ci ildə də ucuzlaşmayacaq: “Bazar ya stabil qalacaq, ya da bahalaşma tendensiyası davam edəcək. Lakin burada əhəmiyyətli artımlardan söhbət getmir. 2025-ci ildə tikinti materialları bazarında qiymətin ucuzlaşacağı ilə əlaqədar heç bir işartı yoxdur. Tikinti materialları təkcə Azərbaycanda deyil, xaricdən də idxal olunur. İdxal qiymətlərinin dəyişməsi də tikinti materialları bazarında qiymətlərə təsir göstərəcək. Yerli istehsala gəlincə, bu məhsulların qiyməti ya stabil qala, ya da bahalaşa bilər”.

 

İsmayıl Bakuvi