Amerikanın elektrikli avtomobil istehsalçısı "Tesla" bu ilin üçüncü rübündə xalis mənfəətini 17%, gəlirini isə 8% artırıb.

İqtisadiyyat.az xəbər verir ki, bu barədə şirkətin press-relizində deyilir.

Hesabat dövründə şirkətin xalis mənfəəti 2,17 milyard dollar və ya hər səhmə görə 0,62 dollar olub. Halbuki, keçən ilin eyni dövründə bu göstərici 1,85 milyard dollar və ya hər bir səhm üçün 0,53 dollar olub.

"Tesla"nın rüblük gəliri isə 23,35 milyard dollardan 25,18 milyard dollara yüksəlib. Üçüncü rübdə şirkətin elektrikli avtomobil tədarükü 6,4% artaraq 462,89 min ədəd təşkil edib.

"Tesla"nın səhmləri bu ilin əvvəlindən bəri 14% ucuzlaşıb.

 

Gözəl Həşimova