Tbilisidə parlament binası yaxınlığında bir neçə yüz nəfər xarici agentlər haqqında qanun layihəsinə qarşı etiraz aksiyası keçirir.
İqtisadiyyat.az TASS-a istinadən xəbər verir ki, mitinqin başlanması yerli vaxtla saat 19:00-da (Bakı vaxtı ilə 19:00) elan edilib, lakin insanlar daha tez toplaşmağa başlayıb.
Əksəriyyəti gənclərdən ibarət olan etirazçılar parlamentin əsas girişində əllərində Gürcüstan və Avropa İttifaqı (Aİ) bayraqları, eləcə də yeni qanun layihəsinin qəbuledilməzliyi barədə yazılar olan plakatlar tutublar. Mitinqdə vəziyyət sakitdir. Parlamentin ətrafında polis qüvvələri yerləşdirilib. Parlament binasının yerləşdiyi Rustaveli prospekti tamamilə bağlanıb.
Aprelin əvvəlində Gürcüstanın hakim partiyası "Gürcü Arzusu - Demokratik Gürcüstan" "Xarici təsirin şəffaflığı haqqında" qanun layihəsini yenidən parlamentə təqdim etmək qərarını elan edib. Bu, oxşar təşəbbüsün kütləvi etirazlara səbəb olmasından bir il sonra baş verir. Qanun layihəsinin mətni "xarici təsir agenti" ifadəsi istisna olmaqla, ötən il olduğu kimidir. Əvəzində "xarici gücün maraqlarını güdən təşkilat" anlayışından istifadə edilmişdir.
Qanun layihəsinə müxalifət, Gürcüstan prezidenti Salome Zurabişvili, həmçinin diplomatik korpus, o cümlədən Aİ-nin Gürcüstandakı missiyası və ABŞ səfirliyi etiraz edib. Təşəbbüsün əleyhdarlarının fikrincə, qanun layihəsi Gürcüstanın Avropa İttifaqına inteqrasiyasına mane olacaq.
