Rusiyanın TASS İnformasiya Agentliyi Azərbaycanda sentyabrın 1-də keçiriləcək növbədənkənar parlament seçkiləri haqqında yazı dərc edib.
İqtisadiyyat.az "Seçki 2024" Müstəqil Media Mərkəzinə istinadən xəbər verir ki, “Azərbaycan növbədənkənar parlament seçkilərinə hazırlaşır” sərlövhəli yazıda qeyd edilir ki, Azərbaycan müstəqillik qazandıqdan sonra ilk dəfə ölkə ərazisinin bütün bölgələrində, o cümlədən Qarabağda və Şərqi Zəngəzurda da parlament seçkiləri keçiriləcək: “Həmin ərazilərdə səsvermə üçün artıq 54 seçki məntəqəsi - 34 daimi və 20 müvəqqəti məntəqə yaradılıb. Burada 42 min seçici öz vətəndaşlıq borcunu yerinə yetirə biləcək”.
Yazıda həmçinin bildirilib ki, parlament seçkilərinin növbədənkənar keçirilməsinə səbəb bu ilin noyabrında Azərbaycanda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) keçirilməsi olub: “Bu seçkilər noyabr ayında keçirilməli idi, lakin həmin dövrdə respublika 80 mindən çox qonaq, o cümlədən 50-dən çox ölkənin dövlət və hökumət başçılarının iştirakı gözlənilən BMT-nin COP29 iqlim konfransına ev sahibliyi edəcək. Buna görə də, parlament üzvlərinin təşəbbüsü ilə Azərbaycan Prezidenti İlham Əliyev iyunun 28-də Milli Məclisin altıncı çağırışını buraxmaq və növbədənkənar seçkiləri sentyabrın 1-də keçirmək haqqında Sərəncam imzalayıb”.
Məqalədə ABŞ-nin “Oracle Advisory Group” təşkilatının Azərbaycandakı keçirdiyi sorğuya da yer ayrılıb.
Məqalə ilə daha ətraflı bu linkdə tanış ola bilərsiniz: https://tass.ru/mezhdunarodnaya-panorama/21722519