Bu gün Xüsusi Rabitə və İnformasiya Təhlükəsizliyi Dövlət Xidməti ilə Mərkəzi Bank arasında memorandum imzalanacaq. Bu da iki təşkilat arasında maliyyə bazarlarında informasiya təhlükəsizliyi və kibertəhlükəsizlik sahəsində məlumatlılığın artırılması və qabaqlayıcı tədbirlərin görülməsi üzrə əməkdaşlığı gücləndirəcək.

İqtisadiyyat.az xəbər verir ki, bunu oktyabrın 26-da Bakı Konqres Mərkəzində keçirilən “Critical Infrastructure Defence Challenge 2023”in (CIDC-2023) açılışında Azərbaycan Respublikası Mərkəzi Bankının sədri Taleh Kazımov deyib.

T.Kazımov qeyd edib ki, kibertəhlükəsizlik sahəsində etibarlı infrastrukturla yanaşı, effektiv əməkdaşlıq münasibətlərinin qurulması da çox vacibdir. Belə olduğu halda peşəkar kadrların yetişdirilməsi adekvat tənzimlənən maliyyə sisteminin formalaşdırılması və onun kiberdayanıqlılığının təmin olunmasına nail ola biləcəyik. Bu səbəbdən də biz Xüsusi Rabitə və İnformasiya Təhlükəsizliyi Dövlət Xidməti və digər aidiyyəti qurumlarla əməkdaşlıq edirik.

"Biz kibermədəniyyətin formalaşdırılması, informasiya təhlükəsizliyi və kibertəhlükəsizlik sahəsində məlumatlılığın artırılması istiqamətində öz qüvvələrimizi birləşdirəcəyik. Bugünkü tədbir ölkənin kibertəhlükəsizlik sahəsinin inkişafı istiqamətində mühüm bir platformaya çevriləcək", - deyə T.Kazımov əlavə edib.