Orxan Fikrətoğlunun Milli Kulinariya Mərkəzindən gedişi və Kino Agentliyinə müşavir təyin olunmasından sonra sözügedən mərkəzin yeni sədrinin kimliyi yenidən müzakirə mövzusu olub.
Məsələ ilə bağlı İqtisadiyyat.az-ın suallarını cavablandıran qurumun sabiq sədri Tahir Əmiraslanov keçmiş vəzifəsinə geri qayıtmaq ehtimalını dəyərləndirib:
"Eşitdiyimə görə, Orxan Fikrətoğlu yenidən kino sahəsinə qayıdıb. Bu, onun işidir və daha yaxşı bilir. Mən Milli Kulinariya Mərkəzindən gedəndə halallıq vermişdim. Kim nə edirsə etsin, mənlik deyil. Bundan sonra kimin təyin olunacağını da bilmirəm. Məni Milli Kulinariya Mərkəzindən vaxtından tez çıxartdılar. Əgər mənə yenidən təklif olunarsa, şərtlərə baxacağam. Əvvəlki təzyiqlər mövcud olarsa, geri qayıtmaq istəmərəm. Yeni sədrin kim olacağını da bilmirəm. Amma Milli Kulinariya Mərkəzinin baş direktoru vəzifəsinə tələbələrimindən birini qoya bilərlər".
Qeyd edək ki, Orxan Fikrətoğlu bir aya yaxındır öz istəyi ilə Milli Kulinariya Mərkəzinin baş direktoru vəzifəsindən gedib. O, Azərbaycan Respublikası Kino Agentliyində müşavir vəzifəsinə təyin edilib.
Gülşən Şərif
