Terror aktları motivlərindən asılı olmayaraq heç bir milli və ya etnik qrupla əlaqələndirilə bilməz və belə olmamalıdır. 

İqtisadiyyat.az xəbər verir ki, bunu Tacikistanın xarici işlər naziri Sirociddin Muxriddin Müstəqil Dövlətlər Birliyinin (MDB) Xarici İşlər Nazirləri Şurasının (XİNŞ) iclası çərçivəsində Minskdə rusiyalı həmkarı Sergey Lavrov ilə ikitərəfli görüşdə vurğulayıb.

Tacikistan Xarici İşlər Nazirliyinin mətbuat xidmətinin məlumatına görə, görüşdə qeyd olunub: "Tacikistan və Rusiya siyasətçiləri, ictimai xadimləri və KİV-ləri bu məsələyə məsuliyyətlə yanaşmağa borcludurlar". 

Departamentdən bildirilib ki, Lavrov tacik nazirin mövqeyini Bölüşüb. Rusiya Xarici İşlər Nazirliyinin başçısı həmçinin Rusiya tərəfinin miqrasiya və digər sahələrdə Tacikistan-Rusiya əməkdaşlığını daha da təkmilləşdirməyə hazır olduğunu bildirib. 

Qeyd edilib ki, həmkarlar Tacikistan-Rusiya münasibətlərinin aktual məsələlərini müzakirə ediblər, söhbət konstruktiv ruhda keçib.