"Suriyanın devrilmiş prezidenti Bəşər Əsəd Azərbaycanla Ermənistan münaqişəsi zamanı Ermənistanı dəstəkləyirdi və ermənipərəst siyasəti ilə seçilirdi".
Bu sözləri İqtisadiyyat.az-a açıqlamasında politoloq Zaur Məmmədov deyib.
O bildirib ki, Suriyada mövcud olan erməni terror təşkilatları haqqında dəfələrlə mediada məlumatlar yayılıb: “Bunlardan biri Nubar Ozanyan adına erməni batalyonu idi. Bu batalyon 2019-cu ildə yaradılmışdı və Azərbaycana qarşı müxtəlif fəaliyyətdə də yer almışdı. Eyni zamanda bütün bu hadisələr bir daha onu göstərir ki, Ermənistan necə ifşaedici siyasətə malikdir. Çünki Ermənistanın baş naziri Nikol Paşinyan bir tərəfdən özünü Qərb koalisiyasının üzvü kimi qeyd edir, amma digər tərəfdən Suriya və İran kimi Qərbə qarşı olan dövlətlərlə əməkdaşlıq edir. Eyni zamanda Ermənistan öz hərbçilərini də Suriyaya göndərmişdi. Əlbəttə, bu gün Suriyada baş verən hadisələr Ermənistanın maraqlarına da ciddi zərbədir. Bu hadisələr bir daha onu göstərir ki, Azərbaycana qarşı siyasət aparan və bizə zərbə vurmaq istəyənlər kimlərdir”.
Politoloq əlavə edib ki, Suriyadakı proseslər, o cümlədən ötən gün Azərbaycan və Türkiyə prezidentlərinin telefon danışı bir daha onu göstərdi ki, Azərbaycan nəinki Cənubi Qafqazda, Yaxın Şərqdə də xüsusi rola malik ola bilər: “Əlbəttə, Suriyada baş verən hadisələrdə Türkiyənin rəyi regional və beynəlxalq aktorlar tərəfindən nəzərə alınmalıdır, çünki Türkiyə regionda yüzillərlə üstün mövqeyə malik olub və hazırda proseslərdən kənarda qala bilməz”.
